Shimwinenu Chakadi Kuleka
1 Mpinji yikwawu, tunateli kutoñojoka netu tunazatilumu chikupu mwiluña detu dakushimwinamu, ilaña antu hiyavula kutiyililaku. Ilaña, kudi yuma yayiwahi yatela kutuleñela kutwalekahu kushimwina.—Mat. 28:19, 20.
2 Kulonda Kuyilila Wunsahu: Yesu washimwineñahu dehi nindi, mudimu wakushimwina Wanta wukekala chinjikijilu chimu chalema hakachi kayinjikijilu yashiyashana ‘yakukuma kwanyaka yamakonu’ nawa wahosheli nindi, akawuzata ‘kulonda wakayilili nyunza yejima wunsahu.’ (Mat. 24:3, 14) Neyi antu atumona tunakushimwina nsañu yayiwahi yaWanta, dikwila nawu tunayilili wunsahu waweni. Hanyima yakufuma munidi iluña, antu amakwawu atela kuhosha hadi maora amavulu hela mafuku amavulu chitwayendela, hela chakwila atiyilila wanyi nsañu. Kwiluka muloña waweni wutwashimwinaña kukutukwasha kwikala nanyikoyi. Twamuzañaleshaña Yehova hakuzata mudimu wakushikija wuprofwetu wamuBayibolu kuhitila mukwilisha wunsahu nikusoñamisha antu hakujilumuka kunakwinza. 2 Tesa. 1:6-9.
3 Nyikoyi Yakeñekaña: Muloña wakwila antu akweti yuma yayivulu yinakuyiluwañesha nikuyimanishila mpinji, tunakukeñeka kwikala nanyikoyi neyi tunakufwila netu antu asweji kwikala nampwila. Mumbanda wumu, amuhempwileña mulungu nimulungu hadi chaaka chamukuma henohu kanda yafuukuluhu kutambika aYinsahu mwitala dindi kulonda kuhanjeka nsañu yamuBayibolu. Watiyili kuwaha nankashi nsañu yahanjekeluwu chakwila wetejeli kudiza Bayibolu, watachikili kuwanika kukupompa, chakadi nikumanisha mpinji wafuukwiluhu kupapatishewa.
4 Yuma yamwekanaña mukaayi yinakuhimpa mukunyakashana, niyililu yawantu nawa yinakuhimpa. Antu akaanini kuyishimwina hakusambila anateli kutiyilila wunsahu wawuwahi wakuchiñeja wutwashimwinaña. Neyi muntu wumu hohu yeteja chiwahi nsañu yaWanta, nyikoyi yetu yikwikala yatelela.
5 Mukaayi kejima, antu amavulu nankashi ‘anakushikoka nakudila nayishimashima yejima yadi nakukoñakoñawu.’ (Ezek. 9:4) Yuma yafumaña mumudimu wetu wakushimwina yinakumwekesha nawu antu afuukwilawu dehi anakutiyilila nsañu yaWanta. (Isa. 2:2, 3) Dichi dinu, tutwalekenuhu nakushimwina chakubula kuleka hakwikala nanyikoyi ‘hakuleta nsañu yayiwahi yayuma yayiwahi.’—Isa. 52:7; Yil. 5:42.