Twalemesha Nyidimu Yetu!
1 Kufuma tuhu kushankulu, Yehova nayinki ambuñindi kukooleka kwashiyashana kwakuvulu nankashi. Nayinki kukooleka hichidi namuloña wakwikala iyala hela mumbanda, yaaka, hela chifulu chikwetiwu muchihadiluku. (Luka 1:41, 42; Yil. 7:46; Fwi. 1:29) Kukoolekanyi kwatwinkayi makonu?
2 Kukooleka Kukwawu Kutukweti: Tukweti kukooleka kwakudizishewa naYehova. (Mat. 13:11, 15) Kumuhameka Yehova kuhitila mukuhoshahu hakupompa kwachipompelu nikwena hikukooleka kukwawu kutwalemesha. (Mas. 35:18) Neyi tudi nakukooleka kwakwakulahu hakupompa, twakulañahu namuzañalu chikupu. Munjila yoyimu, neyi tukumona mudimu wejima wamuchipompelu netu walema, tukuwuzata kushika hakumina ñovu yetu. Komana twazatañaku mudimu wakuwahisha Itala daWanta mpinji yejima nikudihemba chachiwahi?
3 Hela chakwila, antu amavulu ajinokaña nawu kwiji Nzambi watiyaña kulomba kwawu, ilaña etu tukweti kukooleka kwakwiluka netu kulomba kwetu akutiyaña kudi Muntu wabadika kulema mukuleña kwejima. (Yish. 15:29) Yehova yomwenidi watiyaña kulomba kwawambuñindi. (1 Pet. 3:12) Hashimuna mapampa yitwatela kulomba kudi yenaku. Komana tukweti chawaana chachiwahi chakulomba “mafuku ejima”!—Efwes. 6:18.
4 ‘Akwakukalakala Hamu naNzambi’: Kukooleka kwakuwahi nankashi kutukweti kwekala kwakushimwina nsañu yayiwahi yaWanta waNzambi neyi ‘akwakukalakala hamu naNzambi.’ (1 Kor. 3:9) Kushimwina himudimu watuletelaña muzañalu nawa watukoleshaña. (Yow. 4:34) Yehova hakeñaña kuzatisha antu kulonda akalakali iwu mudimuku, ilaña natwinki mudimu weniwu muloña watukeña. (Luka 19:39, 40) Hakwila mwenimu, Yehova hanahani kukooleka kweniku kudi antu ejimaku. Antu azataña mumudimu wahatooka wakushimwina atela kuwanisha nikuhemba yipimu yakeñekaña yakuspiritu. (Isa. 52:11) Komana twalemesha iku kukooleka kuhitila mukwilisha mudimu wakushimwina kwikala chuma chalema chitwatela kuzata mumulungu wejima?
5 Nkisu yafumaña kudi Yehova yaletaña muzañalu munshakaminu yetu. (Yish. 10:22) Bayi tuyimona neyi yamukunkulwayiku! Neyi tukulemesha chikupu mudimu watwinkawu, tukumuzañaleshaña Tata yetu wamwiwulu, Wahanaña ‘yuma yayiwahi yejima, niyamukunkulu yalala yejima.’—Yak. 1:17.