Kudifukula Kudi Yehova Hamu naChisaka
1 Kunyaka, chisaka chazatilileña nyidimu yayivulu hamu. Akoñeleña nyidimu yahetala hamu, sweje-e adiña nakudifukula kudi Yehova hamu nachisaka. (Lev. 10:12-14; Kuhit. 31:12) Makonu, mumatuña amavulu, yisaka hiyazatilaña hamu nyidimu yayivuluku. Hela chochu, eniKristu eluka kulema kwakuzatila nyidimu hamu nachisaka, sweje-e kutalisha kunsañu yakudifukula. Chakubula kujinoka chumichi chamuzañaleshaña chikupu yomweni Watachikili chisaka hakumona yisaka yinakudifukula hamu mukunuñañana!
2 Kushimwina Hamu naChisaka: Kuzatila hamu mumudimu wakushimwina nsañu yayiwahi kwakoleshaña mpanda yachisaka. Kubombela hamudimu wakuya hamu nawantu amakwawu amuchipompelu nakushimwina, eluda watela kuzatila cheñi hamu namwinikwindi nianyanindi mpinji yejima. (1 Tim. 3:4, 5) Hela chakwila ekala nanyidimu yayivulu, ankoñi endaña niwena ambulañaku mpinji yakuzatila hamu nawañodi jawu mumudimu wakushimwina.
3 Anvwali ashimwinaña hamu nawanyanawu ayikwashaña kuyilaku hambidi neyi akwakushimwina. Bayi neyi anyana akumonaña muzañalu wukwetiwu anvwali jawu nikutiya kuwaha mudimu wakushimwina hohuku, ilaña akumonaña anvwali jawu chiyamukeñawu Yehova niakwawu antu. (Kuhit. 6:5-7) Kulema kwakushimwina hamu nawanyana hikunateli kukeheshewa hampinji yinakukulawu anyanaku. Eyala namumbanda akweti anyana awamayala asatu adi nayaaka hakachi ka 15 ni 21 ayaña hamu nanyanawu mpinji yejima nakushimwina. Tata yawu wahosheli nindi: “Mpinji yejima twayidizishañahu chuma chimu. Nawa yuma yitwayileja yekalaña yayiwahi nawa yakuyikolesha chikupu.”
4 Loñeshelenu Hamu: Yisaka yinachimoni neyi chakwashanaña kuloñeshela hamu nsañu yakuhosha mumudimu wakushimwina. Kakavulu anyana atiyaña kuwaha mpinji yakuhitulukamu nawantu amuchisaka nikudihimpa-himpa hakumwekesha chimwenu hela kwikala mwiniitala. Amakwawu azatishaña jiminiti jantesha hakukumisha kudiza kwachisaka kulonda ahitulukumu.
5 Twazañalalaña nankashi neyi tuzatila hamu nyidimu yalema nawa yatiyishaña kuwaha nawantu yitwakeña. Neyi antu amuchisaka akuzatilaña hamu mumudimu wakushimwina kwitala nikwitala nikufuntila nawa nikulombola kudiza kwaBayibolu chikuyiletela muzañalu weneni chikupu. Hampinji yimunakudifukula kudi Yehova hamu nachisaka chenu, munateli kuhosha namuzañalu nenu: “Hakwila ami nimutaña wami tukumukalakela kwetu Yehova.”—Yosh. 24:15.