Mukanda Wunafumi kuMutayi

Kudi Akwakushimwina aWanta:

Tunazañalali hakumona mudimu wunakuyilaku hambidi mwiluña damutayi waZambia muchaaka chamudimu cha 2007. MuMarch apayiniya ampinji yejima ashikili hanaambala yahewulu ya 10,655. Naambala yikwawu yawana kwetu amanisha Shikola yaKudiza Mudimu wawuNkoñi yiyatemeshawu mwiha hamu neyi ankoñi endaña, apayiniya adimena niampinji yejima anakutwala chikupu mudimu wakushimwina hambidi.

Mana kwetu wumu wamanishili Shikola yaKudiza Mudimu wawuNkoñi washimwini nindi: “Hefuku dakutachika kushimwina kwiluña kwatutemesheluwu, antu ahayamini hakumona tunakushimwina kwitala nikwitala. Adiña nakwihula nawu: ‘Munafumi kudihi, kanda tuchimoneñahu dehi kunu?’ Dichi twatachikili kuzata nawakwakushimwina, nakuyikwasha kufwila kwesekeja chiwahi nyidimu yawu yakwakamena yisaka yawu ninyidimu yateokalatiki muchipompelu.” Chuma chinakukeñeka hikutanjika chiwahi nyidimu. Akwakushimwina awakulumpi nawa akuluka yitembi atela kukwasha atwansi.

Yuma yafumaña mumudimu wakuzatila hamu yazañaleshaña chikupu. Kwakwihi namakopi 2 miliyoni aNsañu yaWanta Na. 37, “Kukuma kwaNsakililu yaKutwamba Kudi Mukamwihi!” ayihanini mwiluña damutayi waZambia yejima.

Mudimu wanaka kampeni wekala wakukwasha antu anyichima yayiwahi kudiza chuma chacheni chatañishaña Bayibolu. (Mat. 28:19, 20) Chimukushimwinaña, anukenu kusoneka ejima amwekeshaña mpwila, nawa funtilenuku nachikonkwanyi chakutachika kudiza Bayibolu. Tudi amuzañalu kuzatila hamu nenu muniwu mudimu walema, nawa tunayitumini mutendi wamuzañalu wawiniKristu.

Yetu ana kwenu,

Kasanji Kamutayi waZambia