Kuzata Nañovu muMudimu Wetu waKushimwina
1 Kapostolu Pawulu wakonkomweneni eniKristu kwenda munjila yaNzambi ‘nakuswejeshamu.’ (1 Tesa. 4:1) Indi kwenda munjila yaNzambi nakuswejeshamu chakeñekaña etu kwiladi? Chakeñekaña nawu tutwalekuhu kukeña jinjila jakuzatilamu chikupu nyidimu yakuspiritu, nakufwila mpinji yejima ‘kumanisha mudimu wetu wakushimwina chikupu.’—2 Tim. 4:5.
2 Nkeñelu: Kuzata nañovu mumudimu wetu wakushimwina kwafumaña hakukeña kwetu kwakumukalakela Nleñi yetu chikupu. Tunakukeña kukulilaku lwakuspiritu nikukeña jinjila mutwatela kuwahishilaku mudimu wetu. Kwikala nantanjikilu yayiwahi ninkeñelu yikutwikwasha kushikija yikonkwanyi yetu yateokalatiki.—Mas. 1:1, 2; Fwi. 4:6; Heb. 10:24, 25.
3 Kutoheshaku mudimu wetu wakushimwina kwakeñekaña kwikala naspiritu yakuhana, niyakudihana. Tunateli kwikala naspiritu yakudihana kuhitila mukulomba nikutoñojoka chikupu hachakutalilahu chachiwahi chaYesu. (Mat. 20:28) Yesu wadiña namuzañalu chikupu muloña wakukalakela amakwawu mumudimu windi wakushimwina. (Yil. 20:35) Tunateli kumwimbojola Yesu kuhitila mukwakamena antu nikwikala nampinji yakuzataku mumudimu wetu wakushimwina.—Isa. 6:8.
4 Mudimu waWanvwali: Anvwali atela kudizisha anyana hachidiwu anyanya kwikala nampwila yakukalakela amakwawu nikutoheshaku mudimu wetu wakushimwina. Anyana akumonaña chinakudikitawu antu amuchisaka nichinakuzatawu nañovu kulonda kutoheshaku mudimu wawu. Mana kwetu wumu hachidiñayi kansi amukolesheli kuzata nañovu kudi nkaka yindi weyala hamuloña wakuzatila hamu nyidimu yamuchipompelu. Hakumona nkaka yindi chazatileñayi nañovu nimuzañalu chamuleñesheli niyena kukeña jinjila mwakukalakela amana kwindi. Chayinu mpinji hinkoñi wakuzatila.
5 Yuma Yatela Kwilawu Amana Kwetu: “Muntu nakeñi mudimu . . . , nakeñi mudimu wawuwahi.” (1 Tim. 3:1) Awa mazu akoleshaña amana kwetu kushikahu hakukalakala nyidimu yikwawu mukuloñesha kwaYehova. Ichi hichinakukeñeka kwikala namaana aswejaku. Mana kwetu wunakushikahu watela kusambila kukeña Wanta nikuzata chikupu mumudimu wakushimwina. (Mat. 6:33; 2 Tim. 4:5) Wukufwila kwikala chakutalilahu chachiwahi kudi amakwawu.
6 Mukaayi Kejima: Yehova nakunyakesha mudimu wakupompesha. (Isa. 60:22) Antu ejima anakulondela chakutalilahu chaYesu anakunyakala chikupu kukalakala mudimu wawu wakushimwina. Chileji chamukaayi kejima chachaaka chamudimu cha 2006 chinakumwekesha nawu antu 248,327 ayipapatishili. Ichi chinakwimenaku avareji yawantu akubadika ha 680 amaha anakupapatishewa hefuku nifuku! Komana wejima wetu tutwalekuhu kuwana jinjila jakuzatilamu chikupu mudimu wetu wakushimwina.