Amana Kwetu Achinyiki, Komana Munakufwila Kushikahu Hakuzata Nyidimu yamuChipompelu?
1. Mpinjinyi yatela mana kwetu wakansi kutachika kuzatisha kufumba kwekala ha 1 Timotewu 3:1?
1 ‘Muntu wunakukeña kushikahu hakuzata mudimu, nakeñi mudimu wawuwahi.’ (1 Tim. 3:1) Awa mazu onenewa akoleshaña amana kwetu kushikahu hakukalakala nyidimu yamuchipompelu. Komana hakwila mushikuhu kukalakala nyidimu muchipompelu chiña hohu mwikala akulumpi? Chachiwahi kutachika kufwila kukalakala nyidimu henohu muchidi atwansi. Neyi mwila mwenimu akuyidizisha chakuzata nyidimu nawa munateli kumwekesha nenu anateli kuyitonda kwikala nkoñi mukwakuzatila neyi munakuli dehi. (1 Tim. 3:10) Neyi wudi mana kwetu wakansi wapapatishewa, wunateli kushikahu ñahi hakuzata nyidimu muchipompelu?
2. Munateli kwikala ñahi nayililu yakudihana nikuyimwekesha?
2 Kudihana: Anukenu nenu munakufwila kuzata mudimu wawuwahi, bayi neyi ijina hohuku. Dichi, ikalenu namuchima wakufwila kukwasha amana kwenu niahela. Mwatela kwila mwenimu kuhitila mukutoñojoka chikupu hachakutalilahu chaYesu chachiwahi. (Mat. 20:28; Yow. 4:6, 7; 13:4, 5) Mulombenu Yehova kulonda yayikwashi mwikali namuchima wakukeña kukwasha akwenu. (1 Kor. 10:24) Komana kwila mukwashaku antu amuchipompelu ashinakaja dehi hela akata nehi? Komana mwadihanaña kuya nakukupa, hela kuzataku nyidimu yikwawu yakuwahisha Itala daWanta? Komana munateli kudihana kulonda muhani mpanji yakukasumwisha muShikola yaMudimu waTeokalatiki? Neyi mudihanaña nakukwasha amakwawu chikuyizañaleshaña chikupu.—Yil. 20:35.
3. Indi wuspiritu walema ñahi, nawa tunateli kwikala ñahi nawu?
3 Wuspiritu: Chalema nankashi kudi nkoñi muchipompelu kwikala nawuspiritu kubadika kwikala nachawana hela nawuswa wakusemuka nawu. Muntu wawuspiritu wafwilaña kumona yuma kwesekeja nachayimonañayi Yehova niYesu. (1 Kor. 2:15, 16) Wamwekeshaña ‘mukabu waspiritu.’ (Ŋal. 5:22, 23) Himukwakushimwina wekala neyena watwamijañaku yuma yaWanta. (Mat. 6:33) Munateli kwikala nayililu yakuspiritu kuhitila mukwikala nakudiza kwahalwenu kwakuwahi. Mukudiza kwahalwenu mwabombela kutaña Bayibolu hefuku hefuku, kutaña magazini yidi yejima yaKaposhi Kakutalila niAwake!, kuloñeshela chadimu kupompa nikuyaña kukupompa kwachipompelu. (Mas. 1:1, 2; Heb. 10:24, 25) Hakumukolesha Timotewu hadiñayi kansi kuya hambidi kuspiritu, Pawulu wasonekeli nindi: ‘Dihembi eyi aweni, wuhembi nintañishilu yeyi.’ (1 Tim. 4:15, 16) Dichi zatenu nañovu hakuloñesha mpanji yayinkañawu muShikola yaMudimu waTeokalatiki. Mwenda muloñeshela chadimu henohu kanda muyi nakushimwina, nawa shimwinenuña mpinji yejima. Imikenu nikuzatila hayikonkwanyi yakuspiritu, yidi neyi wupayiniya, mudimu waHabeteli hela kuya kuShikola Yakudiza Bayibolu Yawamana Kwetu Ajiki. Wuspiritu wukuyikwasha ‘kutemuka kufwila kwatama kwawukwenzi.’—2 Tim. 2:22.
4. Indi kwikala washinshika nawa wakuhwelelawu kwalema ñahi?
4 Kwikala Washinshika Nawa Wakuhwelelawu: Hamuloña wakwila amana kwetu enkeluwu mudimu wakwanjañana yakudya kudi akwaKristu adiña mukukankila muyaaka nkulakaji yakusambila ‘adiña nampuhu yayiwahi,’ ayilukili nawu adiña ashinshika nawa akuhweleleluwu, apostolu hiyakameneni nawu hadaha akukañanya kuzata mudimuku. Ichi chaleñeleli ashi maana kuyuma yikwawu yalema. (Yil. 6:1-4) Dichi, neyi ayinka mudimu muchipompelu, wuzatenu nañovu jenu jejima. Imbujolenuña Nowa walondeleli chikupu nshimbi jamwinkeluwu hakutuña watu. (Kutach. 6:22) Yehova walemeshaña nankashi muntu washinshika nawa chamwekeshaña nawu muntu napami kuspiritu.—1 Kor. 4:2; talenu chikasha chinakwila nawu “Nkisu Jafumañamu Neyi Ayidizisha.”
5. Muloñadi amana kwetu achinyiki chiyatela kufwilawu kukalakala nyidimu muchipompelu?
5 Neyi chaprofweteluwu, Yehova nakupompesha antu swayi-swayi. (Isa. 60:22) Kwesekeja naavareji, antu akushika ku 250,000 apapatishewaña chaaka nichaaka. Hamuloña wakwila antu amavulu anakwinza muchalala, amayala ashikahu kuspiritu anakukeñeka kulonda akalakaleña nyidimu yamuchipompelu. Makonu, kudi nyidimu yayivulu yakukalakala mumudimu waYehova. (1 Kor. 15:58) Amana kwetu achinyiki, komana munakufwila kushikahu kuzata nyidimu yamuchipompelu? Neyi dimu, dikwila nawu munakufwila mudimu wawuwahi chikupu.
[Mazu ekoku adi hefu 2]
Hamuloña wakwila antu amavulu anakwinza muchalala, amayala ashikahu kuspiritu anakukeñeka kulonda akalakaleña nyidimu yamuchipompelu
[Chikasha chidi hefu 3]
Nkisu Jafumañamu Neyi Ayidizisha
Amana kwetu achinyiki ashikahu ahetelañamu chikupu neyi aeluda ayinka nyidimu nikuyidizisha. Nkoñi wañinza washakamini hachinañamu nakukolesha mukwakushimwina hanyima yakupompa. Wamweni kansi weyala nemani hambadi nakutalila, dichi wamwihwili neyi chakwila wakeñeleña kuhosha nindi. Mana kwetu wakansi wamulejeli nindi amwinka mudimu wakukomba hachinañamu hanyima yakupompa kudi kwejima. Anvwali jindi akeñeleña kuya, ilaña hakeñeleña kuya henohu kanda yazati mudimu winduku. Nkoñi wañinza watiyili kuwaha chikupu. Wahosheli nindi: “Aeluda munichi chipompelu mpinji yejima adizishileña amana kwetu achinyiki ashikahu kuhitila mukuyinka nyidimu yamuchipompelu. Chafuminumu, mpinji yejima adiña nakuhameka mana kwetu wakansi kulonda amutondi kwikala nkoñi wakuzatila mpinji yejima yinahempwileña ichi chipompelu.”