Londelenu Chakutalilahu Chemikiliyi Yesu
1. Chakutalilahwinyi chemikiliyi Yesu?
1 Neyi hitukuzata mumudimu wakwilisha atumbanji, twatela kwanuka netu chakutalilahu chetu chatela kukwasha chikupu antu anakutumona. Yesu wadizishileña mumazu nimunzatilu. Akwakutala amweneña mpwila yindi, chakeñeliyi antu, kukeña kwindi kwakujilika chikupu ijina daTata yindi, nichafwilileñayi kwila nkeñelu yaTata yindi.—1 Pet. 2:21.
2. Indi chakutalilahu chetu chinateli kukwasha ñahi antu yitunakuzata nawu mumudimu wakushimwina?
2 Hakushimwina Kwitala niKwitala: Chakutalilahu chetu chakwashaña antu yitunakuzata nawu, neyi cheliliyi Yesu. Akwakushimwina amaha hela abula kwilukisha amonaña chitwazataña nañovu mumudimu wakushimwina akutoñojoka chiyatela kuzatawu chikupu mumudimu wawu wakushimwina. Chiyamonawu muzañalu wutukweti nichitwayikeñesha antu, akutoñojoka hakulema kwakumwekesha yililu yamuchidiwu mumudimu wawu wakushimwina. Chiyamonawu chitunakuzatisha jiNsona chachiwahi, kufuntila, kulombola kudiza kwaBayibolu, chikuletesha niwena kwila chochimu.
3. Indi chakutalilahu chetu chikuyidizishadi atudizi aBayibolu, nawa chumanyi chiyatela kudizilaku?
3 Hakulombola Kudiza kwaBayibolu: Sweje-e atudizi etu aBayibolu atalaña hayililu yetu. Chakutalilahu, hela chakwila tukuyilumbulwila kulema kwakuloñesha kudiza, kutaña nsona, nikufunda yikuma yamaneni, anateli kumona neyi chakwila twadiloñesha. (Rom. 2:21) Neyi tukunyakalaña kushika mumpinji yitwadikana kudiza nawu, hiyakusha maana kunyidimu yikwawu yikuyikañesha kudiza Bayiboluku. Chakubula kujina akumona cheñi chitwadihana mumudimu wakushimwina mukudikeñela nichikuhwelelu chetu chakola. Hichatwihayamishañaku hakumona atudizi awantu alondelaña chikupu chakutalilahu chaYesu kakavulu ekalaña akwakushimwina adikita, asoñaña nyikabu.
4. Neyi tuwanika kukupompa kwachipompelu, chakutalilahu chetu chadizishaña ñahi?
4 Hakupompa kwaChipompelu: Hakupompa kwachipompelu ejima ekala muchipompelu chawiniKristu atañishaña kuhitila muchakutalilahu chawu. Akwakukeña kwakuwahi atachikaña kupompa ahetelaña muchakutalilahu chachiwahi chamonañawu muchipompelu. Akumona muzañalu wekala hadi amana kwetu, kunuñañana kwawiniKristu, nvwalilu yatelela nimmwekenu. (Mas. 133:1) Cheñi akumona chakutalilahu chetu chakuwanika kukupompa chikupu nikumwekesha chikuhwelelu chetu hatooka hakupompa. Mwenyi wumu wawanikili kukupompa kwetu wamweni kansi wamumbanda chanyakeliyi kuwana vasi yateneniwu muBayibolu yindi nichalondeleleñayi chachiwahi hakutaña. Chakutalilahu chindi chaletesheli muntu yeniwu kukeña kudiza Bayibolu.
5. Muloñadi wutukubula kudiwula kulema kwachakutalilahu chetu?
5 Nyikanda yatukoleshaña kwimbujola chakutalilahu chachiwahi chawumu namukwawu. (Fwi. 3:17; Heb. 13:7) Dichi, twatela kwanuka netu neyi tulondela chachiwahi chakutalilahu chemikiliyi Yesu, antu amakwawu akumona chakutalilahu chetu nawa chikuyikwasha. Chituneluki mwenimu, tutiyililenu mazu ekala ha 1 Timotewu 4:16 ahosha nawu: “Dihembi eyi aweni, wuhembi kuleja kuwalejaña akwenu.”