Kudikolesha Wejima Wetu Wumu naMukwawu
1. Twekalaña nampinji yamuchidinyi neyi ankoñi endaña anatwendeli?
1 Kapostolu Pawulu wasonekeleli chipompelu chamuRoma nindi: “Nakeñaña nankashi kuyimona, kulonda nakayinki chamukunkulu chakudi spiritu kulonda kuyikolesha. Kulonda twakakwashañani nakukuhwelela kwetu, nikwenwenu nikwamami.” (Rom. 1:11, 12) Lwendu lwatwendelañawu makonu kudi ankoñi endaña kwatwileñelaña kwikala naniyi mpinji yakudikolesha wumu namukwawu.
2. Muloñadi chiyabidikilaña chadimu kwinza kwankoñi wañinza?
2 Chipompelu: Kakavulu abidikaña kuchipompelu kwinza kwankoñi wañinza henohu kunashali tukweji tusatu. Ichi chatwinkaña mpinji yakudiloñesha chadimu kulonda twakahetelimu chikupu. (Efwes. 5:15, 16) Neyi mwazataña, munatela kulomba mpinji yakunooka kumudimu kulonda mwakazatiku mumudimu wamwiha muniwu mulungu. Amakwawu afuukulañahu kuzataku wupayiniya wakukwasha mukakweji wakenza nkoñi. Neyi munakukeña kufumahu kwila muhimpa nehi kulonda mwakekalihu haniwu mulungu?
3. Chumanyi chiyanatwikoleshi kwila hampinji yakutwendela kudi nkoñi kulonda akatwikoleshi?
3 Mudimu walema wendelañayi nkoñi wañinza wekala wakutukolesha nikutudizisha mumudimu wamwiha. Komana kwila mukeña kuzata nindi hela nañodindi nehi neyi wasumbula? Nkoñi wañinza watiyaña kuwaha kuzata nawakwakushimwina amboka-mboka, kubombelahu niana abula kwilukisha hela anakukeña kwiluka kushimwina chikupu. Ejima anateli kudizilaku chinakushimwinayi mumudimu wamwiha nikuzatisha jinjila jatela kuyilejayi. (1 Kor. 4:16, 17) Njila yikwawu yakudikolesha kwawumana kwetu yekala yakumutambika kulonda kudyila hamu nindi yakudya. (Heb. 13:2) Mwatela kutiyilila chikupu, muloña jimpanji jindi jashindamena hakukankila kwachipompelu.
4. Munjilanyi mutwatela kumukoleshela nkoñi yetu wañinza?
4 Nkoñi waÑinza: Kapostolu Pawulu wadiña neyi chochadiña ana kwindi amuchipompelu. Wadiña nakumona kukala nikwakama nawa wahamekeli hakumukolesha. (2 Kor. 11:26-28) Chipompelu chamuRoma chichatiyili nawu Pawulu, mukwakaleya, nakwinza kuRoma, amakwawu ayili nakumukinkilila kuwulandilu waApiyusi—chitampu chakushika kumakilomita 74. “Pawulu chanayimoniyi, hakusakilila Nzambi, akwata niñovu.” (Yil. 28:15) Ninenu munateli kukolesha nkoñi yenu wañinza. ‘Mulemeshenu chabadika’ kuhitila mukumukwasha chikupu chinayendeliyi. (1 Tim. 5:17) Mwekeshenu kuhameka kwenu chikupu hakwinza nakuyikwasha. Yena niñodindi akuzañalala hakumona kukuhwelela, kukeña, nikuumika kwenu.—2 Tesa. 1:3, 4.
5. Muloñadi wejima wetu chitwakeñelaña kutwikolesha makonu?
5 Muyinu “nyaka yakala,” hinyi wabulaña kukeña kumukolesha? (2 Tim. 3:1) Fuukulenuhu yoyinu mpinji kulonda mwakazatiku chikupu mumulungu wadimena nankoñi wañinza. Wejima wetu, ankoñi endaña niakwakushimwina, tunateli kudikolesha wumu namukwawu mumuzañalu. Muniyi njila ‘tukudikundejaña wejima wetu nakudikolesha wumu namukwawu.’—1 Tesa. 5:11.