“Pawulu Wamusakilili Nzambi nawa Wakolesheweli”

Chipompelu chamuRoma chichatiyili nawu Pawulu nakwinza, amanakwetu amakwawu ayili nakumukinkilila, endeli makilomita 64. Kukeña kwamwekesheliwu kwamukwashili ñahi Pawulu? “Pawulu chayimweniyi, wamusakilili Nzambi nawa wakolesheweli.” (Yil 28:15) Hela chakwila Pawulu amwilukili nawu diyi wakolesheleña yipompelu yendeleleñayi, ilaña haniyi mpinji yadiñayi kayili, yena diyi akolesheliwu.—2Ko 13:10.

Makonu ankoñi añinza ayaña nakukolesha amanakwetu niahela muyipompelu. Niwena mpinji yikwawu azeyaña nawa akamaña neyi chelaña ambuña aNzambi ejima. Neyi nkoñi wañinza nimwini kwindi anendeli chipompelu chenu, yumanyi yimwatela kwila kulonda muyikoleshi, kulonda hekali ‘kudikolesha wumu namukwawu’?—Rom 1:11, 12.

• 

  Yenu kukubulakana kwakuya mwiha. Nkoñi wañinza wakoleshewaña neyi akwakushimwina adihana kulonda adiluñishi mulungu wadimena. (1Te 1:2, 3; 2:20) Kwila muzataku wupayiniya wakukwasha mukakweji kanayendeliyi nehi? Kwila muzata nindi mumudimu wakushimwina nehi hela kuya nindi nakudizisha kadiza waBayibolu nehi? Atiyaña kuwaha kuzata nawakwakushimwina ashiyashana, kushilahu niakwakushimwina amaha hela abula kwiluka chakushimwina.

• 

  Yimwekeshelenu chisambu. Kwila muyiloñeshela hakukaama hela yakuda nehi? Neyi mwila mwenimu, ankoñi añinza niañodi jawu akumona nawu mwayikeña. Bayi neyi akeñaña yuma yayivuluku.—Luk 10:38-42.

• 

  Itejenu kufumba nawa londelenu munakuyilejawu. Ankoñi añinza atukwashaña kwiluka chitunateli kuzata mumudimu waYehova. Mpinji yikwawu, anateli kutwifumba chakubula kuhita mumbadi. (1Ko 5:1-5) Atiyaña kuwaha neyi tuyovwahila nawa tuyitiyilila.—Heb 13:17.

• 

  Mwekeshenu kusakilila. Mulejenu nkoñi wañinza nimwini kwindi chimunadiluñishi. Mulejenu namazu amukanwa, kumusonekela kamukanda hela kuyinka kaadi.—Kol 3:15.