Chikasha Chalwihu

◼ Tunateli kuvwala ñahi hakuya nakuhempula matala yazatishañawu hakukalakala mudimu waYehova?

Kunyeñumuka kaayi kejima, Matala aWanta, Matala Akupompelamu kupompa kwamaneni, nyikala yaBeteli, ninyitayi ekala himaluña adimena akukalakelamu mudimu waYehova. Himaluña amawahi, awunyonji, nawa ayiloñeshaña kulonda amwekaneña chachiwahi. Awa maluña ambuka chikupu namaluña ekala mukanu kaayi kaSatana. Antu ahempulaña maluña azatishañawu hakukalakala mudimu waYehova atela kuyiluka nawu hiyantu jaYehova, nawa anakwila nkeñelu yindi.

Etu akwaKristu, “twadimwekeshaña mwakwila nawu tuyakwakukalakala mudimu waNzambi” muyuma yejima, kubombelahu nvwalilu yatelela nikudiwahisha chatelela. (2 Kor. 6:3, 4) Twatela cheñi kudihemba chiwahi. Mpinji yejima twatela kumwekesheña kalemesha kuhitila munvwalilu yalumbuluka nawa yatelela ambuña aYehova Nzambi. Twatela kuvwala chachiwahi sweje neyi tunakuya nakuhempula chishina chanyitayi chamu New York ninyitayi yikwawu yamukaayi kejima.

Kuhosha hakulema kwanvwalilu yatelela nikudiwahisha, mukanda waAbaiteyanya Ukucita Ukufwaya kwa kwa Yehova wahosha hawunyonji wakumujimba, nvwalilu yatelela, nikudiwahisha chiwahi hampinji yitudi mumudimu wakushimwina nihakupompa kwawakwaKristu. Nawa hefu 138, parakalafu 3, hahosha nawu: “Anukenu nenu, ijina dakwila nawu Beteli dalumbulula ‘Itala daNzambi.’ Dichi yililu yetu, kudiwahisha, ninvwalilu yetu yatela kwikala neyi chitwavwalaña hakuya nakupompa Hetala daWanta.” Iyi nshimbi atela kuyovwahila kudi akwakushimwina aWanta ashakamaña kwakwihi naBeteli ninana afumaña kwakulehi. Muniyi njila, enyi amwekeshaña kalemesha nikusakilila chikupu.—Mas. 29:2.

Twatela kumwekana nawu tudi antu “adishimunaña nawu twaakamaña Nzambi” kuhitila munvwalilu yetu. (1 Tim. 2:10) Dichi nvwalilu yetu nikudiwahisha chatelela kwatela kukwasha amakwawu kwikala nammwenu yayiwahi hakudifukula kwalala kwaYehova. Hela chochu, chinelukewi nawu amana kwetu niahela amakwawu anakuvwala yakuvwala yabula kutelela, hela yamwekeshaña mujimba hampinji yakuhempula matala azatishañawu hakukalakala mudimu waYehova. MukwaKristu hatela kuvwala yakuvwala yamuchidiwuku. Muniyi nsañu, twafwilaña kwovwahila iyi nshimbi yambulaña antu jaNzambi netuña muyuma yejima yamuchihandilu chetu chawakwaKristu, kulonda twileña yuma yejima nakumulemesha Nzambi.—Rom. 12:2; 1 Kor. 10:31.

Dichi hampinji yitunakuya nakuhempula chishina chanyitayi ninyitayi yamu New York State hela nyitayi yikwawu, neyi munatoñojoki kuhempula hela mudi hamafuku akunooka nakutala maluña amakwawu, dihulenu nenu: ‘Komana nvwalilu yami nikudiwahisha yinakumwekesha kalemesha, wunyonji, nikulema kweluña dinnakuhempula? Komana nvwalilu yami yinakumwekesha kalemesha hadi Nzambi yinnadifukulaña? Komana nvwalilu yami yikuluwañesha hela kutiyisha amakwawu kutama?’ Dichi mpinji yejima ‘tuwahisheña kuleja kwaNzambi, Chamwinu chetu, muyuma yejima’ kuhitila munvwalilu yetu nimukudiwahisha.—Tit. 2:10.