“Ikalenu Akwakusakilila”
1 Hampinji yokiliyi Yesu akwambumba ikumi, hakachi kawu wumu hohu diyi wafuntili nakumusakilila. Yesu wamwihwili nindi: “Hiyanatookeshi ikumuku? Indi awa atanu nawana adi kudihi?” (Luka 17:11-19) Chalema nankashi kusakilila nikuhameka hayuma yayiwahi yahanañawu yejima, niyamukunkulu yalala yejima yatwinkañayi Tata yetu wamwiwulu, wahanaña nawa wukweti kukeña, Yehova Nzambi.—Kol. 3:15; Yak. 1:17.
2 Yumanyi yitwatela kusakilila? Twasakililaña hefutu danyiloña, chamukunkulu chabadika kulema chahaniniyi Nzambi kudi antu. (Yow. 3:16) Twamusakililaña cheñi Yehova hakutukokela kudi yena. (Yow. 6:44 ) Kunuñañana kutukweti muyipompelu yamukaayi kejima hichuma chikwawu chitwatelela kusakilila. (Mas. 133:1-3) Chakadi kujina, munateli kutoñojoka hayamukunkulu yikwawu yayivulu yahanayi Yehova. Hitunakukeña kwikala neyi aIsarela abulileña kusakilila avulameneni nyidimu yayikoñeleliyi Yehova.—Mas. 106:12, 13.
3 Sakililenuña: Hela chakwila akwambumba ikumi ejima ahamekeli chuma chayikoñeleliyi Yesu, wumu hohu diyi wasakililili. (Luka 17:15) Chochimu, twamwekeshaña kusakilila kuhitila mukuzata nañovu mumudimu wakushimwina. Neyi chalala twasakililaña hayuma yejima yatwikoñelayi Tata yetu wamwiwulu wukweti kukeña, nyichima yetu yikutusañumuna kwimbujola kukeña niluwi lwindi kuhitila mukuleja amakwawu hadi yena. (Luka 6:45) Hampinji yitunakuleja amakwawu ‘hanyidimu yaYehova yakuhayamisha niyitoñojoka yindi yatutoñojokañayi,’ tukusweja kumukeña nikumusakilila Yehova.—Mas. 40:5.
4 Kwashenu Amakwawu Asakilileña: Twatela kukeña jinjila jakukwashilamu anyanetu niatudizi aBayibolu kulonda asakilileña. Anvwali akweti kukooleka kwakuvulu kwakwila mwenimu, chidi neyi hampinji yinakuhanjekawu nawanyanawu hayuma yaleñayi Yehova. (Rom. 1:20) Hampinji yitunakulombola kudiza kwaBayibolu, tunateli kumwihula kadizi wetu netu, “Indi chumichi chinakutulejadi kutalisha hachekalayi Yehova?” Neyi kadizi yeluka chekalayi Yehova, wukusweja kumukeña Nzambi nikufwila kumuzañalesha chikupu.
5 Munanu mafuku akukuminina, antu amavulu hiyanakuhameka nikusakililaku. (2 Tim. 3:1, 2) Yehova watiyaña kuwaha kumona ambuñindi adihana anakusakilila kuhitila mukuzata nañovu mumudimu wakushimwina.—Yak. 1:22-25.