Kundejenu Antu Anakudila
1. Muloñadi anakudila chiyakeñekelaña kuyikundeja?
1 Kufwisha muntu yitwakeña hichuma chaletaña chineñi chikupu, sweje-e kudi antu abula kuchiñeja kwaWanta. (1 Tesa. 4:13) Kakavulu antu amavulu ehulaña nawu: ‘Chumanyi chaleteshaña antu kufwa? Chumanyi chayimwekenaña neyi anafwi? Komana namba kayimona cheñi ayami yinakeña afwa dehi?’ Heshina hadi jinjila jakukundejelamu antu yitwawanaña mumudimu wakushimwina anafwishi ntaña hela ibwambu dawu.—Isa. 61:2.
2. Neyi mwiniitala yatuleja nindi wudi nachipenji, komana mpinji yejima twatela kumushimwina hampinji yayilehi?
2 Kwitala niKwitala: Mwiniitala nateli kutuleja nindi wadiña nachipenji muchisaka chindi katataka. Komana nakumwekana nawu wudi nachineñi? Komana mwitala mudi antaña ananeñi? Neyi chidi mwenimu, chikusweja kuwaha neyi tubula kushimwina hampinji yayilehi. (Mukwa. 3:1, 7) Hadaha tunateli kuhosha netu tunaneñi hakutiya nsañu yakufwa, tunatweshi kumwinka tilakiti yatelela, magazini chili buloshuwa nakushiika munjila yakalemesha. Kufumahu, twatela kufuntilaku hampinji yayiwahi kulonda kuyikundeja cheñi nansañu yamuBayibolu.
3. Neyi chinatwesheki, nsonanyi yitwatela kutañila mwiniitala wunafwishi?
3 Hampinji yikwawu tunateli kwiluka netu twatela kuhosha nsañu yayivulu hampinji yitunadimoni nindi katachi. Hela chakwila himpinji yakukaana yitoñojoka yaluwaku, twatela kutaña nawu yikaninu yamuBayibolu yahosha hakusañuka. (Yow. 5:28, 29) Hadaha twatela kuyileja chuma chahosha Bayibolu kutalisha hachekala afu. (Mukwa. 9:5, 10) Nsañu yamuBayibolu yahosha hakusañuka yinateli cheñi kuyikundeja. (Yow. 11:39-44) Njila yikwawu yatela kwikala yakutaña nawu mazu akuchiñeja mudi Yehova ahosheliyi Yoba. (Yoba 14:14, 15) Henohu kanda tuyi, twatela kuyishiila buloshuwa yinakwila nawu Cinshi Cicitika Nga Twafwa?, Ilyo Untu Watemwa Afwa, hela buloshuwa yikwawu yatelela hela tilakiti. Hekwawu tunateli kuyishiila mukanda waChatañishaña Bayibolu nakuyileja nsañu yidi mukapetulu 6, nikuloñesha kulonda tukahanjeki haniyi nsañu chikupu neyi tunafuntiluku.
4. Mpinjinyi yikwawu yitukweti yakukundeja antu?
4 Hampinji Yikwawu: Neyi chakwila mpanji yachipenji yikwikala Hetala daWanta, komana antu abula kwikala aYinsahu jaYehova akuwanikaku? Mwatela kuyinka nyikanda yatela kuyikundeja. Hayipenji yikwawu antu atiyili kuwaha hakwikala nanyikanda yatelela kulonda kuyinka antaña afwishili. Hampinji yikwawu, nsañu yabidikañawu muchipapilu chansañu kutalisha hachipenji yahanaña njila yakusoneka mukanda wawihi wakukundeja chisaka chinakudila. Hanyima yakutambwila mukanda mwadiña tilakiti, nfwila nimwanindi wamumbanda ayili kwitala damukwakushimwina nakumwihula nawu: “Yenu mwantemeshela iwu mukanda? Inakukeña kwiluka nsañu yayivulu kutalisha haBayibolu.” Iwu iyala nimwanindi etejeli kudiza kwaBayibolu nakutachika kuwanika kuchipompelu.
5. Muloñadi wutwatelela kwikala atona kulonda kukundeja antu anakudila?
5 Mukwakutaŋisha 7:2 wahosha nawu: ‘Chachiwahi kuya kwitala kudi kudila madilu kubadika kuya kwitala kudi chawija.’ Kakavulu muntu wunakudila watela kwiteja kutiyilila chikupu Izu daNzambi kubadika muntu wunakudiluñisha. Wejima wetu twatela kwikala atona kulonda kukundeja antu anakudila kufwa kwamuntu yakeñawu.