Komana Chisaka Chenu Chinadiloñeshi Kapuluka?
1 Wuprofwetu wamuBayibolu washikijewa dehi wahanaña wunsahu watiyakana chikupu wakukuma kwakanu kaayi katama kudi kwakwihi. Tunakushakama munyaka yakala yinadifwani chikupu namafuku adiñaku henohu Dibaji kanda. (Mat. 24:37-39) Nowa wapulukili hampinji yajilumwinuwu antu akushankulu muloña “wendeli naNzambi [walala].” (Kutach. 6:9) Nowa watela wadizishili chisaka chindi nshimbi jaYehova muloña chisaka chindi chapulukili haDibaji. Munjilanyi mutwatela kumwimbujolela Nowa nakudiloñesha hamu neyi chisaka kulonda tukapuluki hakukuma kwakanu kaayi kamakonu katama?
2 Mukwakushimuna Kuloña: Nowa womikili hadi yaaka 40 nakushika ku 50 hamu neyi “mukwakushimuna kuloña.” (2 Pet. 2:5) Hela chakwila antuñi nindi ayiluwañesheli kudi añelu avwalili nyijimba yawuntu hamuloña wakudikaña hela nehi, adiña nakudimbulula mudimu windi wakushimwina. Kakavulu mumudimu wetu wakushimwina twawanaña antu adiwulaña nikudimbulula, chumichi chinakumwekesha nawu kaayi kamakonu kadi kwakwihi nakukuma. (2 Pet. 3:3, 4) Hela chochu, kwambukaku nawantu amumafuku aNowa, antu amavulu anakutiyilila nsañu yitwashimwinaña nawa ‘anakuhwila’ mukudifukula kwaYehova. (Isa. 2:2) Neyi tutwalekahu nanyikoyi ‘tukadamwina etu aweni niantu akututiyilila.’ (1 Tim. 4:16) Komana chalema nankashi kudi anvwali kudizisha anyanawu kutalisha hamudimu wakushimwina chiwekalila wakuzata mukunyakashana kuhitila muyuma yahoshañawu nikuhana chakutalilahu.—2 Tim. 4:2.
3 “Dimu” Mweliliyi: Nowa nichisaka chindi apulukili muloña alondeleleli chikupu nshimbi yaYehova. (Kutach. 6:22) Ninetu makonu chalema nankashi neyi ‘tunyakala kwovwahila’ nshimbi yamuBayibolu niyanduñu wakashinshi. (Yak. 3:17) Anyana akula dehi amuchisaka chimu anukaña chazatishileñayi tata yawu jinjila jamukuloñesha kwaYehova. Chakutalilahu, walombweleña kudiza kwaBayibolu kwachisaka mulungu nimulungu nawa wasendeleña chisaka chindi mumudimu wakushimwina hakukuma kwamulungu wejima neyi chashimunawu. Mulungu nimulungu wadiña nakusendahu mwana wumu mumudimu wakushimwina. Hamuloña wakwila wadiña wakola ‘hakwila’ mwenimu chaletesheli anyanindi kumwimbojola chikupu, nawa anyanindi ejima atanu nawumu ekala ambuña Yehova ashinshika.
4 Kukuma kwakaayi kamakonu kwakenza chakukasumwisha. (Luka 12:40) Kuhitila mukumwimbujola Nowa nikwikala nachikuhwelelu kulonda kupuluka, tukekala adiloñesha hamu nichisaka chetu.—Heb. 11:7.