Kuloñesha hiNsapi yaKufuntilaku Kwakuwahi
1. Indi akwaKristu akusambila adi kutohesha ñahi mudimu wakushimwina?
1 Yesu wayitañishili chikupu atumbanji twindi kwikala akwakushimwina “nsañu yayiwahi yawanta” ahamuka. (Mat. 4:23; 9:35) Yesu wayitañishili hampinji yashimwinineñawu muPalestine hohu. Hela chochu, henohu kanda yayi mwiwulu, Yesu welukili chikupu nindi mudimu wawakwaKristu wakatoha kulonda ‘kwilisha atumbanji munyuza yejima.’—Mat. 28:19, 20.
2. Chumanyi chakeñekaña hakwovwahila lunshimbi lwaYesu ‘lwakwilisha atumbanji’?
2 Iwu mudimu wakeñekaña kufuntila kudi antu amwekesheli mpwila yakudiza nsañu yayiwahi yaWanta waNzambi nikuyileja kuhemba yuma yejima yayilejeliyi Kristu. Twatela kuloñesha chachiwahi kulonda twikali nakufuntilaku kwakuwahi.
3. Hela chikwila hilwendu lwatachi, munateli kwiladi kulonda mwakafuntiluku?
3 Kufuukula Chadimu: Akwakushimwina amakwawu ehulaña lwihu hakukumisha kuhanjeka kwatachi nawa akanaña kufuntilaku kulonda akakuli. Achimona neyi kutaña nsañu yidi mumukanda waChatañishaña Bayibolu hakufuntilaku kwayikwashaña kutachika kudiza kwaBayibolu hohenohu.
4. Muloñadi wutunateleli kubulila kuhembelela magazini amaha mwaka dinu twakafuntiluku?
4 Hakwikala namagazini wowumu akakweji kejima hichinayi mukwila nawu twatela kuhembelela sampu tunatambuli magazini akakweji kakahiñahu mwaka dinu twakafuntilukuku. Chaswayi kusañumuna mpwila yamutu kuhitila hakuhanjeka hansañu yidi mumagazini yikwetiyi muntu.
5. Kuwahanyi kwafumañamu mukwikala nachikonkwanyi neyi munakufuntilaku?
5 Ikalenu naChikonkwanyi: Henohu kanda mufuntiluku, ikalenu nampinji yakuhituluka munsañu yenu nikufuukula hayuma yimunakukeña kuzata. Chakutalilahu, hanjekenu hachikuma chidi mumukanda wumwamushilili. Hadaha mushilenu mukanda wunakuhosha hansañu yimwahanjekeluhu. Neyi mwamwihwili lwihu, mwatela kufwila kwakula olu lwihu. Neyi munakuhanjeka hansona yinakuhosha hanochu chikuma, mwatela kutaña muBayibolu.
6. Chikokwanyi chitukweti kutalisha hakufuntilaku?
6 Chikokwanyi Chetu: Chikokwanyi chetu chekala chakutachika kudiza kwaBayibolu. Mana kwetu wafwilili kutachika kudiza kwaBayibolu hakufuntilaku, ilaña ona muntu wakaanini. Mana kwetu wafuntiluku namagazini yayiha nakuhosha nindi, “Chitunenzi tunakwakula lwihu lumu lwamuBayibolu lunakwihulawu antu lelu.” Hanyima yakutiyilila chahosheli iwu iyala, mana kwetu watañili nsona niparakalafu yatelela mumukanda wazatishañawu hakudiza Bayibolu. Ichi chamuletesheli kwiteja kudiza kwaBayibolu kwampinji yejima.
7. Indi kuloñesha chiwahi kwayikwashaña ñahi kutachika kudiza kwaBayibolu?
7 Kuzata nañovu kulonda kwikala nampinji yakuloñesha kufuntilaku hichuma chachiwahi. Tukwikala namuzañalu chikupu, nawa tukwikala nakukooleka kwakukwasha antu “afuukwilawu dehi” kwikali mujila yaya kuwumi.—Yil. 13:48.