Mukanda Wunafumi kuMutayi

Kudi Akwakushimwina aWanta:

Chaaka chamudimu chinamani twamona nyikabu yayiwahi hamuloña wanyidimu yayiwahi yakalakeluwu. (Isa. 3:10) Mukakweji kaMarch mwadiñi kuvulilaku mapampa kayedi, nyikanda yahaninuwu yabadikili ha 47,000 nikudiza kwaBayibolu kwalombweluwu kwashikili kwakwihi na 250,000. Chalala, Mukanda waChatañishaña Bayibolu wunakukwasha akwakushimwina ejima neyi chinakumwekesha chakuhumañana chinalondeluhu:

Lweendo, wadiña nakukooleka kwakukwasha ntañishi yindi niakwawu akashikola kwiluka chuma chacheni chatañishaña Bayibolu. Chelili mukashikola yehuli lwihu kutalisha hakulusu, ntañishi yaLweendo washindameneni hadi yena kulonda yalumbululi. Lweendo wahosheli nindi, “Chineli nasendaña Bayibolu nimukanda waChatañishaña Bayibolu kushikola mpinji yejima, nanoneli mukanda mwipakumuna dami nakubakula haApendikisi yinakwila nawu, Chabulilañawu eniKristu Alala Kuzatisha Kulusu haKudifukula. Twatañili maparakalafu nijiNsona. Ntañishi yami watiyili kuwaha nawa natachikili kudiza nindi Bayibolu niakwetu akashikola ayedi.”

Chineli kuvula kwawakwakushimwina kunakuyilaku hambidi, kudi kuzata nañovu kulonda kuwahisha Matala aWanta nimaluña akupompela kupompa kwanyanya nikwankambi. Chingola, Kabwe niMufulira adi dehi namaluña akupompelamu anawahishuwu. Anakuzatisha mpinji yeneni, ñovu nimali kulonda kuwahisha maluña akupompelamu antesha amunyikala. Chitunakutachika chaaka chamudimu chachiha, tunakulomba netu spiritu yaNzambi yitusañumuni kukwasha mudimu wakushimwina Wanta munjila yejima.—Mat. 6:33; 10:41.

Yetu ana kwenu,

Kasanji kaMutayi kaZambia