Kudiza Bayibolu kwaHalwetu nikwaChisaka Kwalema Chikupu
1. Kwakamenanyi kwadimena kunakutwakamena Izaza Dalombolaña hayinu mpinji, nawa muloñadi?
1 Neyi chichadiñi muyaaka nkulakaji yakusambila, Izaza Dalombolaña dinakwakamena chikupu chihandilu chawantu jaYehova. (Yil. 15:6, 28) Chineli yihuñu yamaneni yidi kwakwihi, chalema nankashi kudi akwakushimwina aWanta ejima kwikala nawulunda wakola naYehova. Mukazatishaña ñahi mpinji yatanjikiluwu haKudiza kwaMukanda haChipompelu hakusambila? Ejima anayikoleshi kuzatisha iyi mpinji hakudifukula kwachisaka. Neyi tuzatisha iyi mpinji chachiwahi chikutukwashaku kudiza Izu daNzambi chikupu nikuhetelamu muyuma yitwadizaña.—Mas. 1:1-3; Rom. 11:33, 34.
2. Tunateli kuloñesha ñahi kudifukula kwetu kwachisaka kwamelela?
2 Kudifukula kwaChisaka kwaMelela: Nyitu yayisaka yikweti mudimu wayinkawu kudi Yehova wakwiluka nawu anakulondela chikupu progiramu yakudiza Bayibolu kwachisaka mafuku ejima. (Kuhit. 6:6, 7) Amana kwetu niahela ajiki abula nyidimu yamuchisaka akuzatishaña iyi mpinji hakudiza Bayibolu kwahalwawu nikusandujola. Chalema nankashi kudi wejima wetu ‘kukwatila mpinji maana’ kulonda kudiza nikutoñojokahu hakwila twikali nawulunda wakola naYehova hela tudi ‘mumafuku atama.’—Efwes. 5:15, 16.
3, 4. Jinjilanyi jinashimunuwu jitunateli kuzatisha hakudiza nsañu, nawa nayitoñojokanyi?
3 Nsañu yaKudiza: Watch Tower Publications Index hela Watchtower Library yaha CD-ROM yinateli kuyikwasha kuwana nsañu yakuzañalesha chisaka chenu hampinji yakudiza Bayibolu kwachisaka. Yisaka yinateli kutaña yibaba yekalaña muKaposhi Kakutalila kawundeli, yasonekañawu mpinji yejima yidi neyi, “Keys to Family Happiness,” “Teach Your Children,” ni “For Our Young People.” MuAwake! mwekala cheñi chibaba chahoshaña nawu “Young People Ask” ninsañu yayivulu yayiwahi yahoshaña hakuwaha kwayileñaleña.
4 Kuhitila mukutañaña Bayibolu hamu chakadi kunyakala, chikukwashaña ejima amuchisaka kwanuka nikuzatisha nshimbi jaNzambi muchihandilu chawu. (Heb. 4:12) Mpinji yikwawu, munateli kutala nikuhanjeka havidiyo yimu yaloñeshawu mukunu kuloñesha. Munateli kutonda nsañu yayiwahi yakudiza nichimwatela kuyidiza. Komana kwila mwihula chisaka chenu nsañu yinakukeñawu kudiza ninjila mwakudizila nehi?
5. Muloñadi kudiza Bayibolu kwahalwetu nikwachisaka chikwalemena muwumi wetu makonu?
5 Chichalemena Makonu: Kukolesha wulunda wetu naYehova kukutukwasha ‘kwimana ngu-u nikumona wamwinu waYehova.’ (Kwid. 14:13) Anvwali akeñekaña wunlomboli waNzambi watela kuyikwasha hakukulisha anyana “mukachi kawantu amakonu aheña achinchika.” (Fwi. 2:15) Anyana akeñekaña kuyikwasha kulonda atweshi kudikaña nayililu yatama yakumashikola amakonu. (Yish. 22:3, 6) Adisumbula atela kukolesha ‘chibaaba chawu chanyonji yisatu’ naYehova. (Mukwa. 4:12) Dichi wejima wetu, tuzatishenu chachiwahi mpinji yinashaluku kulonda tukoleshi ‘chikuhwelelu chetu chabadika kujila.’—Yuda 20.