Munateli Kwikala Antañishi!
1. Kukoolekanyi kukwetuwu akwakushimwina aWanta ejima?
1 Kudizisha muntu chalala hichuma chaletaña muzañalu chikupu mumudimu wakushimwina. Chitwamumona nakutambwila nsañu yaWanta, twamukwashaña kukundama kwakwihi naMwanta wakuleña kwejima, ichi hichuma chitwalemesha chikupu. (Yak. 4:8) Akwakushimwina aWanta ejima atela kwikala nachikonkwanyi chakudizisha muntu wudi nanzala yachalala nikumukwasha kulonda yahimpi chikupu wuntu windi, niYililu yindi.—Mat. 28:19, 20.
2. Muloñadi amakwawu chajinookelañawu kulombola kudiza kwaBayibolu, nawa chumanyi chikuyikwasha kumanisha iku kukala?
2 Shindamenenu Hadi Yehova: Mpinji yakunyima, ambuña ashinshika adimweneña nawu hiyashikililumu kukalakala mudimu wayinkeluwu kudi Yehovaku. Hamuloña wakushindamena hadi Yehova Nzambi kwaleñeleli Mosi, Yeremiya, Amosa niantu amakwawu akunyima kubula kujinooka hela woma nawa atwalekeluhu kukalakala mudimu walema. (Kwid. 4:10-12; Yere. 1:6, 7; Amosa 7:14, 15) Kapostolu Pawulu niyena ‘womikili.’ Munjilanyi? Walumbulwili nindi womikili muloña ‘waNzambi yetu.’ (1 Tesa. 2:2) Eñañi, wejima wetu twatela kushindamena hadi Yehova kulonda yatukwashi, yatwinki maana, niñovu kulonda tutweshi kulombola kudiza kwaBayibolu.—Isa. 41:10; 1 Kor. 1:26, 27; 1 Pet. 4:11.
3, 4. Kudizishanyi kwatuloñeshelawu nawa kwatukwashaña kwiluka chakutañisha Izu daNzambi?
3 Itejenu Kuyidizisha: Nleji yetu Wabadika, Yehova Nzambi, watuloñeshela progiramu yampinji yejima yakuspiritu yakutudizishilamu kulonda twikali awanina chikupu neyi antañishi. (Isa. 54:13; 2 Tim. 3:16, 17) Tambwilenu iku kudizisha kuhitila mukudikita chikupu kulonda musweji kwiluka jiNsona nikwilukilaku mwakutañishila chalala chamuBayibolu. Hela iyi yuma ayidizishaña muShikola yaMudimu waTeokalatiki, niKupompa kwaMudimu, kupompa kwejima kwachipompelu kwatudizishaña chakutañisha Izu daNzambi.
4 Fwilenu kudiza njila japela jakudizishilamu chalala chakuspiritu chakunama. Mukanda waIsukulu lya Butumikishi ifu 227, walumbulula nawu: “Hakwila nawu mulumbululi chiwahi kudi antu, mwatela kwiluka chiwahi nsañu yejima.” Kuhoshahu hakupompa kwatukwashaña kuhemba yikuma yamaneni kulonda twakayizatishi kumbidi. Dichi loñeshenu chiwahi, neyi mwila mwenimu mukusweja kwiluka mwakudizishila.
5. Kudizishanyi kukwawu kutukweti muchipompelu kwatukwashaña kwikala antañishi amawahi?
5 Neyi chitwashimuna dehi, ankoñi akwaKristu adizilileña kudi wumu namukwawu hampinji yakalakeleñawu mumudimu wakwilisha atumbanji. (Luka 10:1) Neyi chinatwesheki zatenu nawakwakushimwina akuluka yitembi, chidi neyi apayiniya, aeluda, ankoñi endaña, hakulombola kudiza kwaBayibolu. Shinshikenu chinakuzatishawu yakutalilahu munjila yapela ninjila jikwawu jakutañishilamu jawanikaña munyikanda yakudizamu hakulumbulula chalala chamuNsona. Yihulenu ayileji yuma yimwatela kwila kulonda kwikala ntañishi wamuwahi. (Yish. 1:5; 27:17) Hamekenu iku kudizisha kwafumaña kudi amana kwetu niahela, muloña Nzambi diyi watudizishaña.—2 Kor. 3:5.
6. Chumanyi chakeñekaña chikupu hakwikala antañishi Ezu daNzambi?
6 Shindamenenu hadi Yehova, nikuhetela mukudizisha kwatuloñeshelañayi. Lombenuña kulonda muyiluku hambidi. (Mas. 25:4, 5) Neyi mukwasha muntu kwikala ntañishi Wezu daNzambi neyi enu, mukwikala amuzañalu!