Muchiyuulu chaNzambi yileñaleña yejima yadiña mukuwunda nawa yanuñañana

Muloñadi Chitunakukeñela Wanta waNzambi?

Mpinji yayileñeliyi antu atachi, Nleñi yetu wukweti ijina daYehova diyi wadiña Nyuuli nkawindi. Wayuulileña chachiwahi. Waleñeli mukala walubanji, itempa daEdeni, kulonda antu ashakameñamu. Wayinkeli cheñi yakuda yayivulu. Kubombelahu, wayinkeli antu mudimu wawuwahi. (Kutachika 1:28, 29; 2:8, 15) Antu adi kutwalekahu kushakama mukuwunda neyi amwitejeli Nzambi kuyiyuula.

Adama nakwati mukwabu wayikanishiliwu wunamwinkiwu kudi Eva. — Antu atachi amukaanini Nzambi kwikala Nyuuli yawu

Bayibolu yashimuna nawu kañelu wadikañili, atenañawu nawu Satana Diyabolu, wasekesheli wuswa waNzambi wakuyuula. Wamwekesheli nindi antu anateli kwikala namuzañalu chakadi kuyilombola kudi Nzambi hela kuyiyuula. Chawushona, anvwali jetu akusambila Adama naEva, elili mwayidimbiliyi Satana nawa niwena adikañili naNzambi.—Kutachika 3:1-6; Chimwekeshu 12:9.

Chineli Adama naEva amukaanini Nzambi kwikala Nyuuli yawu, ajimbesheli Paradisa nikukooleka kwakushakama haya nyaaka chakadi kukata. (Kutachika 3:17-19) Yuma yeliliwu yaleteli kukala kudi anyanawu. Bayibolu yahosha nawu chineli Adama welili nshidi, ‘nshidi yeñilili mukaayi kuhitila mudi yena, nikufwa nikwena kwenjili kuhitila munshidi.’ (Aroma 5:12) Nshidi yinaleti cheñi ihuñu dikwawu: ‘Muntu nekali nañovu kubadika mukwawu kulonda kumutamisha.’ (Mukwakutañisha 8:9). Munjila yikwawu, kukala kwaswejaña neyi antu anakuyuula akwawu antu.

CHIYUULU CHAWANTU CHINATACHIKI

Nimirodi nemani nakudivwimba. Kunyuma kudi antu nakutuña. — Nimirodi wadikañili naYehova

Nimirodi diyi nyuuli wawantu watachi atenawu muBayibolu. Nawa wadikañili nawunyuuli waYehova. Kufuma tuhu mumpinji yaNimirodi, antu akweti ñovu azatishaña wuswa wawu chatama. Hadi yaaka 3,000 yinahitihu, Mwanta Solomoni wahosheli nindi: “Hinukumona madilu awantu akabishewa, hiyakweti niwakuyikundejaku; ñovu hijidi kudi akwakuyikabisha.”—Mukwakutañisha 4:1.

Kukala saña kwayila nimakonu. Mu 2009, mukanda wawaUnited Nations wahosheli nawu, “yuma yatama yinakuswejelaku muloña wawanyuuli atama.”

MPINJI YAKWILAHU CHUMA!

Kaayi kanakukeña anyuuli amawahi ninfulumendi yayiwahi. Nawa dichatukanayi Nleñi yetu!

Nyevulu: Yuma yinakuleta nfulumendi yawantu. 1. Mumbanda wakuAsia nashakami munjila yamajilu nawa nakati mwanindi wunakudila. 2. Kanshinakaji weyala wakata wudi muchipatela hakakadidi. 3. Amashidika anakuloza. 4. Akwakudikaña anakubidika iku anakwati yipapilu. 5. Mumabanda nimwanindi anemani hanji yetala dawu, anatala igilasi dahawindu dinabaluki. 6. Musumba munakufwinda wishi nawa mudi nsambu jamalayiti. — Ninfulumendi jawantu jamonañawu nawu jajiwahi jinakañanyi kumanisha kukala kwamonañawu antu

Nzambi washaku dehi Wanta hela nfulumendi yikasinsa jinfulumendi jawantu jejima, nawa wena nkawawu “wakemana mbe haya nyaka.” (Danyeli 2:44) Iwu diwu Wanta walombañawu antu amavulu. (Matewu 6:9, 10) Nzambi yomweni diyi wakayuulaña muniwu wanta wanyi. Ilaña watonda muntu wekalahu dehi namujimba wawuntu kwikala Nyuuli. Nzambi watondanyi?