Tondenuhu Kuhakwilaku Wanta waNzambi Yinu Mpinji
Fwikijenu anayileji nawu kwiluña denu kukwikala mpempela yeneni yahurricane. Nfulumendi yinakuyisoñamisha nawu: “TEMUKENU! ENDESHENU FUMENUMU!” Mukufuukulahu kwiladi? Chakadi nikujina, mukutemukila kwiluña kunabuli wubanji.
Munjila yoyimu, wejima wetu tudi kwakwihi ‘nanvula yampempela yeneni’ yateneniyi Yesu nindi “lukadi lwasweja.” (Matewu 24:21) Kwila tutwesha kutemuka ilu lukadi nehi. Ilaña kudi yuma yitwatela kwila kulonda tudikiñi. Yumanyi yeniyi?
Mumpanji yindi yahaMpidi, Yesu Kristu watulejeli nindi: “Twalekenuhu kusambila kukeña Wanta [waNzambi] nikuloña kwindi.” (Matewu 6:33) Tunateli kwila ñahi mwenimu?
Sambilenu kukeña Wanta waNzambi. Ichi chinatalishi mukwila nawu twatela kumona Wanta waNzambi netu walema kubadika yuma yejima. (Matewu 6:25, 32, 33) Muloñadi? Muloña antu anakañanyi kumanisha kukala kwejima kwamonañawu. Wanta waNzambi hohu diwu wunateli kukwimanisha.
Keñenu kuloña kwindi. Twatela kuzata nañovu kulonda twovwahileña nshimbi jaNzambi niyishina yindi. Muloñadi? Muloña neyi tudifuukwilaña etu aweni yuma yakwila mukufuma kukala. (Yishimu 16:25) Ilaña neyi tulondelaña nshimbi jaNzambi, tukumutiyishaña kuwaha nawa tukwikala nachihandilu chachiwahi.—Isaya 48:17, 18.
Twalekenuhu kusambila kukeña Wanta waNzambi nikuloña kwindi. Yesu washimwini nindi amakwawu akayikokola nawa akatoñojokaña nawu anateli kwikala akiñewa neyi ekala namali amavulu. Hadaha amakwawu akazeya muloña wakusweja kwakama chakwila hiyakekala nampinji yakukeña Wanta waNzambiku.—Matewu 6:19-21, 25-32.
Hela chochu, Yesu wakanini nindi ejima ahakwilañaku Wanta waNzambi akwikalaña nayuma yakeñañawu chayinu mpinji nawa akayikiswila kumbidi.—Matewu 6:33.
Hela chakwila atumbanji twaYesu hayina mpinji asambilili kukeña Wanta waNzambi nikuloña kwindi, atwalekelihu kumona yihuñu nimakabi. Ilaña adiña akiñewa. Munjilanyi?
Ovwahilileña nshimbi jaNzambi jaloña, nawa chumichi chayikiñili kuyuma yatama yamwonañawu antu adiwulaña mwahoshañayi Nzambi. Kukuhwelela chikupu nawu Wanta waNzambi wakenza dikwayikwashili kuumika kukala kwejima kwamweneñawu. Nawa Nzambi wayinkeli “ñovu yabadika hañovu jawantu” kulonda atweshi kuumika kukala kwamweneñawu.—2 Akorinda 4:7-9.
SAMBILENU KUKEÑA WANTA
AkwaKristu amumafuku awapostolu ovwahilili lushimbi lwaYesu lwakusambila kukeña Wanta. Ashimwinini nsañu yayiwahi yaWanta kudi antu ejima adiñaku hayina mpinji. (Akolosi 1:23) Kudihu anakuzata iwu mudimu makonu?
Eña! A Yinsahu jaYehova aneluki nawu kunashali hohu kampinji kantesha hakwila Wanta waNzambi wufumishihu nshakaminu yamakonu. Dichi azataña nañovu kulonda ovwahili mazu ahosheliyi Yesu nindi: “Ninsañu iyi yayiwahi yaWanta akayishimwina mwahita iseki dejima mwashakamawu antu kulonda yikekali wunsahu kudi akwanyuza yejima, mwaka dinu kukuma kwakenzi.”—Matewu 24:14.
Mukwila ñahi neyi ayishimwina nsañu yayiwahi? Tunayikoleshi kwila neyi chelili akwaMasidoniya amumusumba wamuBereya. Chatiyiliwu nsañu yayiwahi yaWanta yayishimwininiwu kudi Kapostolu Pawulu, “atambwilili mazu namuchima wawu wejima.” Nkumininaku, ‘atalatalili muNsona’ kulonda amoni neyi yumiyi yadiña yalala nawa azatishili yuma yadiziliwu.—Yilwilu 17:11, 12.
Dichimwatela kwila ninenu. Neyi musambila kukeña Wanta waNzambi nikuloña kwindi, mukwikala muchiswamu chakiñewa makonu nawa mwakekala mukuwunda nawa akiñewa haya nyaaka kumbidi.