‘Yuma Yejima Yimwelaña Yilenuña Hamuloña waNsañu Yayiwahi’
1. Chumanyi mukwakushimwina waWanta chafwilañayi kwilayi kudi antu nawa muloñadi?
1 Kapostolu Pawulu welukili nindi wadiña namudimu wakushimwina nsañu yayiwahi kudi antu. (1 Kor. 9:16, 19, 23) Chochimu, chineli twakeñaña netu antu akaheti wumi wahaya nyaka chatuleñelaña kuyishimwina nsañu yayiwahi.
2. Neyi tunakushimwina, yumanyi yitwatela kuhimpa, nawa muloñadi?
2 Shimwinenu Kumunateli Kuwana Antu nihaMpinji Yawanikañawu: Chibinda wanshi wakuluka yitembi, bayi neyi wataña kaleñi kindi heluña hanakeñiyi hela hampinji yinakeñiyiku, ilaña wataña heluña nihampinji yinateliyi kulawulayi inshi. Ninetu hakwikala ‘ayibinda awantu,’ twatela kuhimpa ndandanda yetu hakwila nawu tuwaneña antu mwiluña detu dakushimwina kulonda kudiluñisha chikupu mudimu wakupompesha ‘nyichidi yanshi yejima.’ (Mat. 4:19; 13:47) Komana kwila tuya nakushimwina namelela kulonda kuyishimwinaña antu hamatala awu hela kushimwinaña mumukwakwa nampinji yantetemena, nehi? Chikonkwanyi chaPawulu chadiñi ‘chakushimuna [chikupu] nsañu yayiwahi,’ nawa washimwinineña hampinji yatelela.—Yil. 17:17; 20:20, 24.
3, 4. Hampinji yitudi mumudimu wakushimwina, njilanyi jitunateli kuhimpa nawa yumanyi yafumañamu?
3 Himpenu Njila yaKushimwinamu Kwesekeja naWantu Amwiluña Denu daKushimwina: Chibinda wanshi wahimpaña njila jakutilamu kulonda kulawula muchidi wanshi wunakukeñayi. Tunateli kushimwina ñahi nsañu yayiwahi yaWanta kulonda kukokola antu adi mwiluña detu dakushimwina? Twatela kubabala neyi tunakuhosha hansañu yinakundami kudi antu amavulu amwiluña nikutiyilila nakanañachima hayuma yinakuhoshawu. (Yak. 1:19) Twatela kuyihula chinakutoñojokawu. (Yish. 20:5) Neyi twilaña mwenimu tukushimwinaña nsañu yayiwahi munjila yinateli kuyishika antu hanyichima. Pawulu ‘wesekeni nawantu ejima muyuma yejima.’ (1 Kor. 9:22) Kuhimpa njila yakushimwinamu chikutuleñelaña kushika antu hanyichima.
4 Tukweti muzañalu weneni hakushimwina antu “nsañu yayiwahi yayuma yayiwahi”! (Isa. 52:7) Dichi twatela ‘kwila yuma yejima hamuloña wansañu yayiwahi’ kulonda kuyishimwina antu amavulu.—1 Kor. 9:23.