Akamenenu Antu—Kuhitila Mukushimwina Chakubula Chaambu
1 Muchimwenu, kapostolu Yowanu wamweni kañelu nakutuuka hakachi kaluzwizu nasendi nsañu yayiwahi yahaya nyaka kulonda yashimuni kudi antu ‘akunyuza yejima ninyichidi yejima, niakwamadimi ejima niantu.’ (Chim. 14:6) Komana twalondelaña chakutalilahu chakañelu kuhitila mukushimwina chakubula chaambu? Chakubula kwiluka, tunateli kwikala nayitoñojoka yakwikala nachaambu. Yililu yetu kutalisha kudi antu yitwawanaña yinateli kukwasha hela kuluwañesha njila yitwashimwinañamu nsañu yayiwahi kudi wena. Dichi neyi hitukushimwina kudi antu akweti nkulilu yashiyashana, twatela kumwekesha kukeña kwakuyakamena chikupu.
2 Ilukenu Antu Adi Mwiluña Denu: Komana mwiluña denu mwekalahu añinza hela amatunduka? Hadaha hitunateli kuyakamena nankashuku. Ikalenu atachi kuya nakukeñakeña antu amuchidiwu nawa ilukenu chekalawu. Ilukenu yuma yinakukankilawu nawa yinakwakamawu, niyuma yakeñawu niyabula kukeñawu. Ilukenu cheñi woma wukwetiwu nichaambu. Fwilenu kuhimpa nhoshelu yenu yansañu yaWanta chashikila. (1 Kor. 9:19-23) Kufwana kapostolu Pawulu, twatela kwiluka netu tukweti mudimu wakushimwina nsañu yayiwahi kudi antu adi mwiluña detu, kushilahu ninana afuma kwituña dacheñi, antu akuyisemwa yashiyashana, ahoshaña muchidi wacheñi, niasamaheta.—Rom. 1:14.
3 Hela chochu, mukutwesha ñahi kushimwina kudi muntu wahoshaña idimi dacheñi? Zatishenu chiwahi kamukanda kaGood News for People of All Nations. Cheñi mwatela kusenda matilakiti nimabuloshuwa amumadimi ahoshañawu antu amavulu mwiluña denu. (Talenu Mudimu Wetu waWanta wachiBemba waJuly 2003, ifu. 8, mapara. 2-3.) Cheñi nawa akwakushimwina amakwawu anakushañaku ñovu yakwiluka kwimusha nikuhosha chantesha hohu munyichidi yacheñi. Kakavulu antu atiyaña kuwaha neyi atiya muntu nakweseka kuhosha mumuchidi wawu, hela tuhu nakukabakana hakuhosha, nawa chumichi chatela kuyikokwela kunsañu yayiwahi.
4 Mwimbujolenu Yehova: Kuhitila mukuhanjeka nawantu akweti nkulilu yashiyashana, dikwila nawu tunakumwimbujola Yehova Nzambi yetu wabula chaambu, ‘wukweti nkeñelu yakwila nawu antu ejima atela kuhanda nawa atela kwiluka nsañu yalala chikupu.’—1 Tim. 2:3, 4.