Kwikala Neluña daKushimwinamu Mwekala Antu Ahoshaña Idimi Dacheñi
1. Kukoolekanyi kutukweti hampinji yitunakushimwina mwiluña detu datwinkawu?
1 Yesu Kristu washimwineñahu dehi nindi nsañu yayiwahi akayishimwañena mwahita matuña ejima “kulonda yakayilili nyuza yejima wunsahu.” Antu ejima azataña mudimu wakushimwina nikutañisha eluka chalemawu awa mazu. (Mat. 24:14; 28:19, 20) Chitwayaña nakushimwina nikwilisha atumbanji, twawanaña antu afuma kumatuña acheñi ahoshaña idimi dacheñi. Antu wenawa atelela kutiya nsañu yaWanta kulonda akakeli chikupu kuchalala henohu ifuku daYehova dakutiyisha woma kanda dishiki. (Mal. 3:18) Tunateli kwikala ñahi neluña dakushimwinamu mwekala antu ahoshaña idimi dacheñi?
2. Munjilanyi mutwamwimbujolilaña Yehova hakuhanjeka nawantu ahoshaña idimi dacheñi?
2 Monenu Antu Ahoshaña Idimi Dacheñi Neyi Chayimonañayi Yehova: Hakwila tumwekeshi kukeña kwaYehova chakadi chaambu kudi antu amwiluña detu, twatela kwikala namuchima wakuyikwasha kulonda eluki chalala hadi Yehova Nzambi, hichikweti muloña nedimi dahoshañawuku. (Mas. 83:18; Yil. 10:34, 35) Hela chakwila twashimwinaña nankashi kudi antu ahoshaña idimi ditwazatishaña muchipompelu chetu, twatela cheñi kusha muchima hadi antu ahoshaña idimi dacheñi nikukeñakeña jinjila jakuyishimwina nsañu yaWanta waNzambi. Neyi tudiwula antu ahoshaña idimi dacheñi hitunakuzata kwesekeja nankeñelu yaYehova yakuyilila nyunza yejima wunsahuku. Hanu dinu, tunateli kukwasha ñahi antu abulaña kuhosha idimi detu?
3. Kamukandanyi kakawahi katuloñeshelawu, nawa tunateli kudiloñesha ñahi kulonda tukizatisheña?
3 Zatishenu kaMukanda kaGood News for People of All Nations: Aka kamukanda akisoneka kulonda tukizatisheña neyi tuwana antu ahoshaña idimi dacheñi. Dichi kisendenuña mpinji yejima, nawa ilukenu nsañu yashiyashana yidimu nawa diloñeshenu kulonda mukizatisheña. Hakwila nawu muwani nsañu swayi, fundenu madimi ashiyashana ahoshaña antu mwiluña denu. Neyi mukweti nyikanda munawa madimi, chikuwaha neyi mukutambula yantesha kulonda mumwinki mwiniitala hanyima yakumanisha kuhanjeka nsañu yidi mukamukanda.
4. Tunateli kuzatisha ñahi kamukanda kaNations mumudimu wetu wakushimwina?
4 Neyi muwana muntu wahoshaña idimi dacheñi mwiha nawa himuneluki idimi dahoshañayuku, sambilenu kumuleja chipapilu chahewulu chakamukanda. Talenu mapu yakaayi kejima hachipapilu chamukachi, dinyikenu nawa shimunenu ituña dimwashakamaña nawa mwihulenu yayileji kwafumayi niidimi dahoshañayi. Chimweluka idimi dahoshañayi, talenu hachipapilu chayuma yidimu, keñenu ifu hadi idimi dahoshañayi, mulejenu nsona jidi muwulombu wiyila hewulu defu nawa mulejenu yatañi mazu wenawa. Chamanishayi kutaña mwinkenu tilakiti yamwidimi dindi hela mulejenu mazu asonekawu muwulombu wafukuluka anakushimuna nawu munakukeña kufuntilaku kulonda mwakamuleteli mukanda mwidimi dindi. Kuhiñahu mulejenu mazu anakwila nawu “ijina dami” adi muwulombu wiyila nawa mulejenu ijina denu. Inyikenu hamazu anakwila nawu “ijina denu” adi muwulombu wiyila, nawa hembelenu yayileji ijina dindi. Tiyañanenu kulonda mwakafuntiluku.
5. Chumanyi chitwatela kwila kulonda twakameni muntu wukweti mpwila yakudiza Bayibolu wahoshaña idimi dacheñi?
5 Mwani Mukeñenu Iwu Muntu: Twatela kuzata nañovu kulonda tufuntili kudi antu amwekeshaña mpwila yansañu yaWanta, hichikweti muloña nedimi dahoshañawuku. Chitweluka netu owu muntu nakukeña kumwiluka Nzambi nikudiza Izu dindi, Bayibolu, twatela kusoneka fomu yinakwila nawu Mwani Mukeñenu Iwu Muntu (S-43) nakumwinka nsoneki wachipompelu kulonda yatemeshi kukasanji kamutayi kulonda ona muntu wukweti mpwila yakudiza Bayibolu akamwendeli kudi muntu wahoshaña idimi dindi. Kasanji kamutayi kakatemesha iyi fomu kudi izanvu dahoshaña idimi denidi. Chatambulawu iyi fomu, akumwendela iwu muntu chakadi kumba mpinji. Nsoneki nateli kumwinka nkoñi wamudimu fomu yimu kulonda yeluki mpwila yinakumwekesha izanvu dahoshaña idimi dacheñi. Mwatela kuzatisha iyi fomu chiña neyi muntu yomwekesha mpwila yakudiza chikupu.
6. Neyi tuwana muntu wukweti mpwila yakudiza Bayibolu wahoshaña idimi dacheñi, tunateli kwiladi?
6 Hanateli kuhita mpinji kufuma hampinji yimukuhana fomu ya S-43 nakushika hampinji yakamwendelawu muntu wunamwekeshi mpwila yakudiza Bayibolu kudi mukwakushimwina wahoshaña idimi dindi. Dichi, hakwila nawu mukwashi muntu yeniwu yatwalekuhu kwikala nampwila, mukwakushimwina wasonekeli fomu ya S-43 nateli kutwalekahu kumwendela sampu nichakamwekana muntu weluka idimi dindi. Hadaha munateli kudiza Bayibolu namuntu wukweti mpwila yakudiza. Indi mukwakushimwina nateli kutambula ñahi nyikanda yamwidimi danona muntu wukweti mpwila yakudiza Bayibolu, kushika nimpinji yakawanawu muntu weluka idimi dindi?
7. Njilanyi yaloñeshawu yakutambwilamu nyikanda mumadimi awantu twawanaña?
7 Nyikanda yaMwidimi Dacheñi: Yipompelu bayi yihemba nyikanda yayivulu yamwidimi dacheñuku. Hela chochu, neyi nkoñi wamudimu namoni nindi antu ahoshaña idimi dacheñi anakutachika kumwekesha mpwila yakudiza chalala, nateli kutambula nyikanda yantesha mwidimi denodu yakuzatisha akwakushimwina. Neyi hachipompelu hosi iyi nyikanda munateli kusonekesha. Hanateli kuhita mpinji hakwila nawu nyikanda yamwidimi denodu yishiki hachipompelu. Hela chochu, kudi njila yakuwaninamu iyi nyikanda kuzatisha www.watchtower.org. Kudi nyikanda yayivulu yamumadimi ambokamboka yinateli kuwanayi mukwakushimwina swayi-swayi hela muntu wukweti mpwila yakudiza. Chakadi kujina, iyi njila yikuzatika chachiwahi hampinji yimunakukwasha antu anamwekeshi mpwila yakudiza ahoshaña idimi dacheñi.
8. Indi chipompelu chikweti mudimwinyi wakukwasha antu ahoshaña idimi dacheñi akweti mpwila yakudiza?
8 Mudimu Wukweti Chipompelu: Mpinji jikwawu mwiluña mwekala antu ahoshaña idimi dacheñi anakuvulilaku, hadaha kwosi chipompelu chidi kwakwihi chazatishaña idimi denodu. Dichi, munateli kutambika antu akweti mpwila yakudiza Bayibolu ahoshaña idimi dacheñi kwinza nakupompa. Neyi muyitambwila chachiwahi nikuyakamena akukoleshewa nawa akwinzaña nakupompa mpinji yejima. Hatachi, kuhanjeka kukuyikalila muloña wedimi nichisemwa, hela chochu, kwosi mukoleku wukukañesha kukeña kwalala kwawakwaKristu kwakeñawu anakwawu aYinsahu jaYehova amukaayi kejimaku. (Zef. 3:9; Yow. 13:35) Komana mwahoshaña idimi dacheñi nakulamuna? Neyi mwahoshaña nawa munadihani kukwasha antu ahoshaña idimi denodu, mwani mulejenu nsoneki wachipompelu chenu kulonda yahani wunsahu weniwu kukasanji kamutayi. Chumichi chikukwashaku kasanji kamutayi neyi kanakukeña mukwakushimwina watela kukwasha muntu wahoshaña idimi dacheñi.
9. Yumanyi yikuletesha akwakushimwina ayiteji kudiza idimi dacheñi, nawa shikoliyi akuyitachika ñahi?
9 Kudiza Idimi: Hampinji yimunakukwasha antu ahoshaña idimi dacheñi, chikuwaha neyi mukuyikolesha kutachika kuya nakupompa mwidimi dawu neyi kudi chipompelu kwakwihi. Neyi hichikutweshekaku, akwakushimwina amakwawu anateli kudiza idimi dacheñi, kulonda akwashi awa antu akweti mpwila yakudiza. Neyi kwosi chipompelu kwakwihi kasanji kamutayi kanateli kufuukulahu kudizisha akwakushimwina idimi hamuloña wawantu amavulu afuma kumatuña acheñi hela añinza. Neyi chikala mwenimu, kasanji kamutayi kanateli kuleja yipompelu yidi kwakwihi kutalisha hakukankila kweniku nikubidika hashikola yakudiza idimi dacheñi. Antu anakukeña kudiza idimi dacheñi atela kwikala nachikonkwanyi chakuya kwizanvu dahoshaña idimi dacheñi hela chipompelu kulonda iluña dakushimwina denidi diyi hambidi.
10. Yumanyi yikuletesha kutachika izanvu dedimi dacheñi, nawa yumanyi yikuyikwashaku?
10 Chakutachika Izanvu: Hakwila nawu kwikala izanvu mwidimi dacheñi mwatela kuwanisha yuma yiwana yalema yakeñekaña. (1) Mwiluña dakushimwina mwatela kwikala antu amavulu akweti mpwila yakudiza Bayibolu. (2) Akwakushimwina antesha atela kwiluka idimi hela kudiza idimi denodu. (3) Kwatela kwikala eluda washikahu hela nkoñi wakuzatila kulonda yalomboleña nikutwaminina kupompa kamu hamulungu munidi idimi. (4) Izanvu dawaeluda datela kwikala namuchima wakukwasha izanvu dinakudiza idimi. Neyi muwanisha yumiyi, izanvu dawaeluda dikasonekela kasanji kamutayi wunsahu wejima wanidi izanvu nawa akukeña kuyiluka nawu chipompelu chinakukwasha izanvu dinakudiza idimi dacheñi. (Talenu mukanda waAbaiteyanya, mafu 106-107.) Eluda hela nkoñi wakuzatila wunakulombola wukwikala “mukulumpi wezanvu” hela “nkoñi wezanvu” wukweti mudimu wakutala idi izanvu.
11. Kuwahanyi kwekala mukwikala neluña dakushimwinamu mwekala antu ahoshaña idimi dacheñi?
11 Kwikala neluña dakushimwinamu mwekala antu ahoshaña idimi dacheñi hichuma chalema nankashi nawa himudimu wekala hakachika kakampeni yakushimwina mukaayi kejima watachikiliyi Yesu Kristu, Chakutalilahu chetu. Dichi, tuzatenu nañovu kulonda tukalakala mudimu wetu chitukumonaña Yehova chinakukankishayi nyunza nakuleta yuma yayiwahi kudi yena. (Hag. 2:7) Twatiyaña muzañalu chikupu hakukalakala iwu mudimu mukunuñañana. Tunakulomba nkisu yaYehova yikali hamudimu wutunakudikita mukunuñañana wakwikala neluña dakushimwinamu mwekala antu akwacheñi nawa mpinji yejima twanukeña netu hichikweti muloña nedimi dahoshaña antuku, Nzambi diyi wakulishaña—1 Kor. 3:6-9.