Chimwatela Kwila Neyi Mwiniitala naKuhosha Idimi daCheñi
1. Muloñadi chikunakukeñekela chikupu kutiyañana hampinji yakuzatila mwiluña dakushimwinamu?
1 Kakavulu, akwakushimwina aWanta kuhita mukaayi kejima awanaña antu akweti mpwila ahoshaña idimi dacheñi dabulaña kuzatishawu muchipompelu chawu. Hakwila nawu akwashi mudimu wakushimwina kudi antu wenawa, nyitayi yayivulu yinamoni neyi chachiwahi kuloñesha izaza dahoshaña idimi dacheñi niyipompelu. Chineli mwiluña dimu munateli kwikala antu hoshaña madimi amavulu, yipompelu yayivulu yazatishaña madimi amboka-mboka yinateli kushimwina mwiluña dodimu. Indi yipompelu yinateli kutiyañana ñahi kulonda eluki chikupu nawu mudimu wakushimwina wunakuzatewa munjila yaloña?—1 Kor. 14:33.
2. Hampinji yakushimwina kwitala nikwitala, tunateli kutiyañana ñahi nezanvu hela chipompelu chahoshaña idimi dacheñi mwiluña detu?
2 Kutiyañana Chachiwahi: Hampinji yakushimwina mumukwakwa hela kushimwina kwamumpanji, mukwakushimwina watela kwikala wakasunuka kushimwina muntu wudi wejima, kubombelahu niantu ahoshaña idimi dacheñi, nikumwinka muntu mukanda mwidimi dinakeñiyi kutaña. Hela chochu, neyi munakushimwina kwitala nikwitala mwiluña dazatilañawu cheñi kudi amakwawu azatishaña idimi dacheñi hela chipompelu, mukwakushimwina watela kushimwina hohu kumatala awantu ahoshaña idimi dazatishaña chipompelu chawu. Neyi chakwila yipompelu yashiyashana yashimwinaña mwiluña dodimu, chalema kuhemba nsañu chachiwahi. Ankoñi amudimu atela kutiyañana nawakwawu nakuloñesha yuma munjila yayiwahi kulonda ejima ahetelumu. (Yish. 11:14) Hela chochu, neyi mukwakushimwina nakushimwina kwitala nikwitala yowana muntu wahoshaña idimi dacheñi nawa kwosi yipompelu yahoshaña idimi denodu kwakwihi, mukwakushimwina watela kufwila kumushimwina nikutwalekahu kumukwasha muntu wunamwekeshi mpwila.
3. Twatela kwila ñahi neyi tuwana akwakushimwina ekala mwizaza hela muchipompelu chahoshaña idimi dacheñi anakuzatila mwiluña dakushimwinamu ditunakuzatila?
3 Twazataña Mudimu Wowumu: Munateli kwila ñahi neyi akwakushimwina adi muyipompelu yacheñi anakushimwina mwiluña dodimu ifuku dimu? Hela chochu, kukeña kwawakwaKristu kukubadika mukoleku wachaambu chamadimi, nawa wejima wawu akwakamena chikupu hakukankila kwawantu amwiluña dakushimwina. (Yow. 13:34, 35) Dichi dinu, anakulombola akumwekesha kashinshi nikukeña hakufuukula neyi chakwila izanvu dikwawu dikutachika kushimwina mwiluña dikwawu hakapinji kantesha.—Yak. 3:17, 18.
4. Wuprofwetwinyi wunakushikijewa makonu?
4 Bayibolu yaprofweteli nawu antu akumadimi acheñi akatiya nsañu yayiwahi. (Chim. 14:6, 7) Kuhitila mukutiyañana chikupu nayipompelu yejima, akwakushimwina anateli kutondolwelela kushimwina hetala dimu nawakwakushimwina ekala mwizanvu hela chipompelu chazatishaña idimi dacheñi. Kwila mwenimu, munateli kushimwina nsañu yayiwahi kudi antu amaha amavulu, kubombelahu niantu ahoshaña idimi dacheñi.—Efwes. 4:16.