Henohu Kanda Mushimwini, Keñakeñenu Antu Ahoshaña Idimi daChipompelu Chenu
1. Muloñadi yipompelu yekala mwiluña mwahoshañawu madimi amavulu chayinkelawu maluña akushimwinamu kwesekeja nedimi dawu?
1 Chatambwililuwu spiritu yajila hefuku daPentekosta 33 C.E., atumbanji twaYesu ‘atachikili kuhosha madimi acheñi’ nawantu afumini kumatuña akwakulehi. (Yil. 2:4) Chuma chafuminumu, antu akushika ku 3,000 apapatisheweli. Kafwampi enyi amavulu ahosheleña cheñi idimi dahosheleñawu antu amavulu, hadaha chiHeberu hela chiGriki. Ilaña Yehova wafuukwiluhu nindi nsañu yaWanta ayishimwini mumadimi awu. Chakadi nikujina chuma chaletesheli ayishimwini mumadimi awu chakwila nawu antu avula kutiyilila chikupu nsañu yayiwahi neyi ayishimwina mwidimi dawu. Makonu, mwiluña mwahoshañawu madimi amavulu, yipompelu yejima ayinka maluña akushimwinamu kwesekeja nedimi dazatishaña chipompelu chawu. (Abaiteyanya, ifu 107, mapara. 2-3) Mazanvu azatishaña idimi dacheñi ayinkaña wanyi maluña akushimwinamu, ilaña ashimwinaña antu ahoshaña idimi denodu mwiluña dachipompelu chiyekalamu nimumaluña ayipompelu yikwawu yamukamwihi.
2. (a) Indi mudimu wakukeñakeña himudimwinyi nawa munateli kukeñakeñela kudihi? (b) Indi yipompelu yinateli kukwashañana ñahi hakuzatila mwiluña mwahoshañawu madimi amavulu? (c) Chumanyi chitwatela kwila neyi tuwana muntu wunamwekeshi mpwila wahoshaña idimi dacheñi?
2 Neyi mwekala mwiluña mwahoshañawu idimi dimu, munateli kushimwina kwitala nikwitala. Hela chochu, chikwambukaku neyi mwashakamaña mumusumba mwahoshañawu madimi amavulu. Yipompelu yahoshaña madimi acheñi niyena yashimwinaña mwiluña dodimu. Hela chakwila yipompelu yinateli kuyileja nsañu yawantu awanañawu ahoshaña idimi dimwazatishaña, chipompelu hela izanvu denu didu dikweti mudimu weneni wakukeñakeña antu imwatela kushimwina. (Talenu chikasha chinakwila nawu “Kwashañanenu.”) Dichi mwatela kwikala namudimu wakukeñakeña nikwihujola kumwatela kuwana antu ahoshaña idimi denodu. Munateli kukeñakeña ñahi antu ahoshaña idimi denodu?
3. Chumanyi chikuleñela chipompelu hela izanvu kwiluka iluña dakukeñakeñela antu nikuleha kwampinji yatela kuzatawu iwu mudimu?
3 Kuloñesha Mudimu Wakukeñakeña Antu: Kuleha kwampinji yimwatela kuzata mumudimu wakukeñakeña mwiluña mwahoshañawu madimi amavulu kwashindamena chekala yuma mwiluña denu. Chakutalilahu, mwiluña denu mwekala antu añahi ahoshaña idimi denodu? Mwekala akwakushimwina añahi? Indi chipompelu hela izanvu dikweti makeyala añahi? Chipompelu hichatela kuzatisha mpinji yoyimu hakukeñakeña antu mumaluña ejimaku, ilaña chatela kufuukulahu kuzata nañovu mumaluña mwekala antu amavulu mwiluña dawu dakushimwinamu nimaluña abula kwikala kwakulehi nankashi. Ilaña kuloñesha chiwahi mudimu wakukeñakeña kwalema hakwila tukwashi antu amavulu nankashi ekali nakukooleka kwakutambika ijina daYehova.—Rom. 10:13, 14.
4. (a) Indi mudimu wakukeñakeña antu anateli kuwuzata ñahi? (b) Njilanyi jikwawu jakuwaninamu antu ahoshaña idimi denu?
4 Hakwila nawu mubuli kumanisha mpinji nakukeñakeña kumaluña kwatelela kukeñakeña, izanvu dawaeluda sweje-e nkoñi wamudimu watela kuloñesha nikulombola mudimu wakukeñakeña antu. (1 Kor. 9:26) Mumazanvu azatishaña madimi acheñi, mana kwetu washikahu sweje-e eluda hela nkoñi wakuzatila atondawu kudi izanvu dawaeluda ekala muchipompelu chinakukwasha izanvu denodu diyi watela kulombola. Yipompelu nimazanvu amavulu aloñesha chiwahi mudimu wakukeñakeña antu, hadaha azatishaña mukanda mwekala majina hela Intaneti hakwila nawu apompeshi majina avula kuzatishawu munodu idimi. Mudimu wakukeñakeña awuzataña kuhitila mukutemesha jinshiña hela kuhempula antu kulonda eluki makeyala atela kubombelawu mwiluña dakushimwina. Neyi iyi yuma yinateli kuzatika, izanvu dawaeluda muchipompelu chakwashaña izanvu dazatishaña idimi dacheñi dinateli kutanjika kulonda chipompelu chejima chizatuku mudimu wakukeñakeña antu mpinji jikwawu.—Talenu chikasha chinakwila nawu “Chakuwana Antu Ahoshaña Idimi Denu.”
5. (a) Njilanyi jikwawu jatela kuzatishawu akwakushimwina anakuzata mudimu wakukeñakeña antu? (b) Yumanyi yitwatela kuhosha nawantu neyi tunakukeñakeña antu?
5 Twatela kwikala nachikonkwanyi hampinji yitunakuzata mudimu wakukeñakeña halwetu. Chineli iwu mudimu niwena himudimu wakushimwina, twatela kuvwala chiwahi neyi akwakushimwina adi mumudimu wakushimwina. Amavulu ahitulukaña njila jakuzatisha nichakuhosha idimi denodu mumudimu wakukeñakeña chayikwashaña kuzata nayena nawa elukaña kuhosha idimi. Tunateli kusoneka maora itwazataña mumudimu wakukeñakeña antu bayi mpinji yitwazataña hakuloñesha maapu yeluña nindandandaku. Neyi tuwana muntu wahoshaña idimi denodu, twatela kumushimwina nsañu yayiwahi nakumuleja nkoñi wamudimu swañu-swañu hela muntu wazatilaña hamu nindi kulonda abombeluhu nsañu yikwawu yamwiluña dakushimwina. Tunateli kwila mwenimu chili muntu namwekeshi mpwila hela nehi. Hela chakwila mudimu wakukeñakeña antu walema, twatela kwesekeja yuma kulonda tuzatuku njila jikwawu jamumudimu wakushimwina.—Talenu chikasha chinakwila nawu “Chakuhosha muMudimu Wakukeñakeña Antu.”
6. Indi mudimu wakukeñakeña atumama wekala nakukalanyi kwadimena?
6 Kukeñakeña Atumama: Mudimu wakukeñakeña atumama wekala nakukala kwadimena nawa wakeñekaña kuzata nañovu nawa chakubula kuleka. Hitunateli kumwiluka muntu netu hikamama neyi tumona chasonekañayi ijina dindi, chekalayi kumesu hela nvwalilu yinduku. Cheñi nawa, antaña jindi niamabwambu anateli kusweka hela kushintajala kuleja akwakushimwina anakukeña kumwiluka. Iji njila jinalondeluhu jakukeñelamu atumama jinateli cheñi kukwashana hakukeñakeña antu ahoshaña.
7. (a) Hakwila tuwani kamama mumaluña mwashakamañawu tunateli kwihula netudi? (b) Chumanyi chitwatela kwila kulonda mwiniitala yabuli kujinoka?
7 Yipompelu nimazanvu azatishaña idimi dawatumama atweshaña kuwana atumama neyi anakwihula mumaluña mwashakamañawu. Hadaha mwiniitala wamonahu dehi ntuñi nindi, mukwawu muyazatilaña hela mukwawu muyatañilaña nakuzatisha idimi dawatumama. Indi kwiji wamonahu chinjikijilu kumukwakwa chakusoñamisha antuñinawu nawu hadi anyana atumama. Hadaha wukweti ntaña yindi kamama. Ilukenu nenu antu akujinoka yuma yimunendeli. Hela chochu, munateli kuzata nañovu kulonda mwiniitala yabuli kuyijinoka neyi mwikala aseha nikulumbulula nakalemesha nawa mukwihihisha. Amakwawu awana nawu mwafumaña yuma yayiwahi neyi amwekesha Bayibolu hela maDVD amakwawu hampinji yinakwihulawu mwiniitala neyi chakwila welukahu kamama. Kuhiñahu ahoshaña nawu anakufwila kuyileja nsañu yakuchiñeja yekala muBayibolu nawantu amuchidiwu. Neyi mwiniitala yashintajala kuyileja, nateli kutambula kaadi hadi keyala yenu hela chipapilu chakutambika nachu antu kuchipompelu kulonda amwinki ntaña yidi kamama hela ibwambu dindi.
8. Indi chipompelu chekala kwakwihi chinateli kukwasha ñahi chipompelu chazatishaña idimi dawatumama?
8 Chipompelu chazatishaña idimi dawatumama chatela kuleja chipompelu chidi kwakwihi chazatishaña idimi dacheñi kulonda chiyikwashi kukeñakeña atumama mwiluña dawu deneni dakushimwinamu ifuku dimu hela ayedi muchaaka. Ekala muchipompelu chazatishaña idimi dawatumama neyi anakulombola kuhumañana kwakuya mumudimu wakushimwina atela kuwejelahu nshimbi yinakuhosha haniyi nsañu nichimwenu. Hamazanvu ejima awakwakushimwina hatela kwikala muntu wumu wekala muchipompelu chazatishaña idimi dawatumama nawa atela kuyinka maapu yinakumwekesha iluña dakukeñakeñela.
9. Munateli kukeñakeña ñahi atumama heluña hapompelañawu nakuhanjeka nikuhema hela kutambula wukwashu wahanañawu munodu iluña?
9 Mwatela cheñi kukeñakeña kwiluña delukawu antu nawu dikwapompelaña atumama nakuhanjeka nikuhema hela kutambula wukwashu wahanañawu munodu iluña. Akwakushimwina atela kuvwala yakuvwala kwesekeja neluña dawu. Chikuwaha neyi muhanjeka namuntu wumu hela ayedi nikwikala asoñama kubadika kuhanjeka nezanvu dejima. Neyi muntu wukweti mpwila, hadaha munateli kumwinka keyala hela naambala yenu yanshiña nawa tambulenu yindi.
10. Indi akwakushimwina atela kukeñakeña ñahi atumama mumaluña mwazatilañawu antu?
10 Njila yikwawu yekala yakuloñesha jimaapu jinakumwekesha maluña mwazatilañawu antu nikuyihempula hampinji yatelela. Hamaapu yimu hatela kwikala maluña alandishilañawu manji amunyotoka. Hamaapu yikwawu hatela kwikala maluña akoselañawu yakuvwala, malesitilanti, mahotelu hela maluña amakwawu azatilañawu antu. Neyi hamaapu ejima hekala maluña wowamu azatilañawu antu, akwakushimwina anateli kuzatisha njila yoyimu nawa akukuluka yitembi hakukeñakeña antu. Chakutalilahu, hamahotelu havula kwinza atumama dichi tunateli kulumbulula mudimu wetu kudi muntu watambwilaña enyi nikumwinka DVD nichipapilu chakutambika nachu antu kukupompa kulonda yayinki atumama enzañahu. Hamaluña akuzatila amakwawu tunateli kwihula hohu neyi hazatilaña hela henzaña antu azatishaña idimi dawatumama. Neyi mwiluña detu mwekala shikola yawatumama, tunateli kuyinka nyikanda yekala haDVD kulonda ashi mulayibulali.
11. Muloñadi mudimu wakukeñakeña antu chiwekalila njila yalema yamudimu wakushimwina?
11 Mudimu Walema: Hakwila tuwani eni matala ahoshaña idimi detu himudimu wakola. Kubombelahu, mwiluña dakushimwinamu munateli kwinza antu ahoshaña madimi acheñi muloña antu abuukaña, nawa chakalaña kubombelahu nsañu yikwawu yamwiluña dakushimwina. Hela chochu, mumaluña amavulu, mudimu wakukeñakeña antu hinjila yalema yamudimu wakushimwina. Yehova watwinka mudimu wakushimwina hakweti chaambuku. (Yil. 10:34) Yena “wakeña antu ejima nindi ahandi, eluki nsañu yalala chikupu.” (1 Tim. 2:3, 4) Dichi tuzatilenu hamu naYehova niamana kwetu kulonda tuwani antu akumadimi ejima akweti “muchima wawu wawuwahi.”—Luka 8:15.
[Chikasha chidi hefu 5]
Kwashañanenu
Neyi chipompelu hela izanvu dinakukeña kuyikwasha kulonda awani antu iyatela kushimwinawu ahoshaña idimi dazatishañawu, nkoñi wamudimu watela kuhanjeka nawaeluda amuyipompelu yidi mukamwihi azatishaña idimi dacheñi. Chikuwaha neyi muhanjeka nayipompelu yabula kwikala kwakulehi nankashi hela yikweti antu amavulu ahosha odu idimi. Chipompelu chinehuluwu chatela kuleja akwakushimwina amuchipompelu chawu nawu neyi awana muntu wudi wejima wahoshaña odu idimi atela kusoneka keyala yidi nakwinka nkoñi wamudimu kulonda yahani kuchipompelu hela kwizanvu dinakukeña wukwashu. Ankoñi amudimu amuniyi yipompelu atela kuzatila hamu kulonda awani njila yatela kuzatika chiwahi hakuzatila mwiluña mwahoshañawu madimi amavulu nikuleja antu akweti mpwila kuya kuchipompelu hela izanvu dahoshaña idimi dawu.
Neyi akwakushimwina awana muntu wahoshaña idimi dacheñi wukweti mpwila chikupu yakudiza (hela kamama), atela kusoneka swayi-swayi fomu yaMwani Mukeñenu Iwu Muntu (S-43), nakumwinka nsoneki wachipompelu. Neyi mwila mwenimu akumukwasha muntu kuspiritu swayi-swayi.—Talenu km 5/11 ifu 3.
[Chikasha chidi hefu 6]
Chakuwana Antu Ahoshaña Idimi Denu
• Ihulenu antu amakwawu—atudizi aBayibolu, antaña, akwenu akwanyidimu niamakwawu.
• Zatishenu mukanda mwekala jinaambala janshiña kulonda muwani majina avula amunodu idimi. Mukanda mwekala majina atanjikawu kwesekeja nakeyala wunateli kwikala haIntaneti hela kukampani kajinshiña.
• Ikalenu asoñama kulonda mwihuli hamaluña hakalakelañawu antu chidi neyi kumalayibulali, tusanji twanfulumendi nihamakoleji.
• Talenu muyipapilu yansañu neyi anashimunumu yisela yinaloñeshuwu kudi antu ahoshaña idimi dacheñi.
• Yenu kumasitolu nikumaluña akuzatila kwayaña antu ahoshaña idimi dacheñi.
• Neyi anayinki lusesa kudi atupitawu, shenu nyikanda hamesa heluña dakuzatila, hashikola yamuñoñi, hela hachitesheni hayaña antu ahoshaña idimi denodu.
• Neyi nshimbi yeteja mwituña denu, landenu mukanda weneni mwekala majina hela progiramu yahakompyuta yakeñakeñaña maluña haIntaneti.
[Chikasha chidi hefu 7]
Chakuhosha muMudimu Wakukeñakeña Antu
Mwiniitala hakujinokaku neyi mwikala aseha nikumuleja yuma yimunendeli chakubula kuhita mumbadi. Chikusweja kuwaha neyi mukusambila kumuleja nyikanda yamunodu idimi.
Neyi munamwimushi munateli kuhosha nenu: “Tunakukeña antu ahoshaña ․․․․․ kulonda tuhanjeki nawu nsañu yakuchiñeja yekala muBayibolu. Munelukuhu muntu itwatela kuhanjeka nindi?”
Neyi tunakukeña atumama tunateli kuhosha netu: “Ñahi mwani. Mukuñiteja niyilejuku chuma chimu? [Zatishenu kachisanji kavidiyo kakwenda naku, mulejenu vasi yimu muNew World Translation—Yaha DVD.] Iyi hivasi yamuBayibolu yidi mwidimi dawatumama dakuAmerica. Bayi neyi twekala naBayibolu hohuku, ilaña tukweti cheñi mavidiyo amavulu akukwasha nachu atumama kuspiritu nawa twayilandishaña wanyi. Komana mweluka kamama wudi wejima hela muntu wabulaña kutiyishisha wazatishaña idimi dawatumama?” Neyi mwiniitala helukahu kamama wudi wejimaku, chikuwaha neyi mumwila kulonda yayileji maluña kwawaniniyi kamama chidi neyi kumudimu, hashikola indi kwiji muchituñilu.