Shenu Kashinshi Kakukeñakeña Anjika Matu Mwiluña Denu
1 Yehova nakutambika nindi: “Inzaña. . . . Yowu wukukeña kutambula, atambuli menji awumi chakadi kulanda.” (Chim. 22:17) Anjika matu amavulu nankashi adi hakachi kawantu anakwiteja kuniwu mutambi. Chumichi chinaleteshi yipompelu yantesha mwituña detu kwikala namazanvu eluka muchidi wawanjika matu anakudiluñisha kupompa kwachipompelu Mwidimi dawaNjika Matu dakuAmerica.
2 Hela chakwila mazanvu eluka muchidi wawanjika matu, ñovu yawu yakushimwina yashindamenaña hohu hakushimwina anjika matu niantu akweti wufwayi wakutiya amwiluña dawu, antu amuchidiwu amavulu achidi kanda ayiwani nakuyishimwina mudinu ituña.
3 Munateli Kuyikwasha Ñahi? Hampinji yimudi mumaluña awantu amavulu, mwamonahu dehi antu anakuzatisha muchidi wawanjika matu? Komana mwelukahu muntu wumu wakumudimu wenu hela wahashikola yenu wukweti ntaña yindi njika matu? Shenuku kashinshi kakukeña kuwana anjika matu hampinji yimunakukalakala nyidimu yenu yamafuku ejima. Dichi mukwiluka ñahi nenu akatambwila nsañu yaWanta?
4 Kuhana Wunsahu: Lejenu izanvu deluka muchidi wawanjika matu kwatela kumuwanawu iwu wanjika matu. Anjika matu amavulu akulaña swayi mukudiza chalala neyi chakwila anakuhanjeka nawaYinsahu anjika matu hakupompa kwachipompelu kwalombolañawu muMuchidi wawaNjika Matu wakuAmerica. Dichi, neyi kudi izanvu deluka muchidi wawaNjika matu mwiluña denu, nsoneki wachipompelu chenu watela kutuma nsañu yanawa antu anjika matu adi mwiluña denu.
5 Indi neyi kwosi muntu wudi kwakwihi watela kuyikwashaku anjika matu adi mwiluña denu lwakuspiritu? Munateli kuyikwasha ñahi? Komana kwila mufuntilaku cheñi nakuhosha nantaña yindi watiyaña wahadina itala nehi? Neyi chinatwesheki, dihanenu muyitalishi vidiyo yidi mumuchidi wawanjika matu kulonda musañumuni mpwila yamuntu wanjika matu. Akwakushimwina amakwawu anadizi Muchidi wawaNjika Matu wakuAmerica kulonda ayishikeña anjika matu hanyichima. (Yil. 16:9, 10)
6 Kuhitila mukwikala asoñama kulonda kukeñakeña antu anjika matu adi mwiluña denu, mukutwesha kuyinka kukooleka kwakutambwila menji awumi akadi kulanda.—Mat. 10:11.