CHATELA KUSHAKAMAWU AKWAKRISTU
Nuñañanenu Hakushimwina Mwiluña Mwahoshañawu Madimi Amavulu
Kakavulu antu atejaña nsañu yaWanta neyi muyishimwina mwidimi dawu. Hadaha dichaletesheli haPentekosta 33 C.E., Yehova yapompeshi “aYudeya amulemesheleña Nzambi afumini kunyuza yejima,” kulonda atiyi nsañu yayiwahi ‘mwidimi dawu,’ hela chakwila kakavulu ahosheleña chiHeberu hela chiGiriki. (Yil 2:5, 8) Makonu mumaluña mwahoshañawu madimi amavulu, mwekala yipompelu yazatishaña madimi amboka-mboka nawa ekalaña neluña dimu dakushimwina. Akwakushimwina muniyi yipompelu anateli kwikala ñahi anuñañana kulonda ashimwini antu ejima chakadi kuneñesha mwiniitala kuhitila mukuyaku kapampa kakavulu hefuku?
Hanjekenu (Yis 15:22): Ankoñi anyidimu amuyipompelu yashiyashana atela kuhanjeka kulonda awani njila yakushimwina chiwahi mwiluña mwekalawu. Neyi iluña dawu danyanya, yipompelu yazatishaña idimi dacheñi yinateli kuleja yipompelu muyekalila neluña dimu dakushimwina kubula kushimwina hamatala hadi antu ahoshaña idimi dawu. Hela chochu, neyi anakukañanya kushimwina hamatala mpinji yejima muloña wakutoha kweluña, anateli kuyileja nawu abuleña kukilokela matala ilaña neyi awana muntu wunamwekeshi mpwila atela kuyileja. (od 93 ¶37) Hela anateli kuleja chipompelu chenu kulonda chiyikwashiku kuwana antu ahoshaña idimi dazatishañawu muchipompelu chawu nawa neyi munayiwani mwatela kuyinka keyala yawu. (km 7/12 5, nichikasha) Mwatela kwanuka nenu, mpinji yikwawu hetala dimu anateli kuzatisha madimi amavulu. Njila yejima yimukuloñesha hakushimwina mwiluña dejima yatela kwesekana nanshimbi.
Nuñañanenu (Efw 4:16): Londelenu nshimbi jejima jikuyilejawu kudi nkoñi wamudimu. Komana mwadizishaña muntu Bayibolu wabula kwilukisha idimi dimwazatishaña muchipompelu chenu? Kadizi nateli kupama swayi neyi mumuhana kudi muntu wazatishaña idimi dahoshañayi.
Diloñeshenu (Yis 15:28; 16:1): Neyi mwiniitala mwiluña denu dakushimwina wahoshaña idimi dacheñi, mukwila chiwahi neyi mumushimwina nsañu yayiwahi. Munateli kudiloñesha neyi mwiluka madimi azatishañawu mwiluña denu kuhitila mukuloñolola Bayibolu nimavidiyo amunowu madimi hachozelu chenu. Munateli cheñi nikuzatisha JW Language app kulonda mwiluki chemushañawu mumadimi amakwawu.