Chakuzatisha Mukanda Wunakwila Nawu “Kukeña kwaNzambi” haKulombola Kudiza Bayibolu

1. Indi mukanda wunakwila nawu “Kukeña kwaNzambi” wamudimwinyi?

¹ Twazañaleli chikupu hakutiya nsañu yabidikiluwu kutalisha hamukanda wawuha wunakwila nawu “Shakamenu muKukeña kwaNzambi” haKupompa kwaNkambi kwadiña nakwila nawu “Twalombolewaña naSpiritu yaNzambi.” Kwesekeja nachabidikiluwu, iwu mukanda awusoneka kulonda wutukwashuku kwiluka nikukeña nshimbi jaYehova nawa bayi neyi wakutañishilamu nsañu yapela yamuBayiboluku. Iwu mukanda twakawuhanaña wanyi kwitala nikwitala.

2. Indi iwu mukanda akuwuzatishaña ñahi, nawa nawantu amuchidinyi?

² Iwu mukanda wakekala mukanda wamuchiyedi wakudizamu nawatudizi aBayibolu hanyima yakumanisha mukanda wunakwila nawu Chatañishaña Bayibolu.a Ilukenu nenu antu amakwawu apamaña kuspiritu swayi-swayi amakwawu hahitaña mpinji. Mwatela kulombola kudiza kwejima kwesekeja nawuswa wakadizi. Mwatela kwiluka chikupu nenu kadizi natiyishishi nsañu yimunadizi. Iwu mukanda himwatela kuwuzatisha hakutachika kudiza Bayibolu nawantu adiza dehi kunyuma nyikanda yayivulu, abulaña kuwanika kukupompa kwachipompelu nawa abulaña kuhimpa chihandilu chawu kwesekeja nachalala chamuBayibolu chayidizishiluwuku.

3. Chumanyi chitwatela kwila neyi tunakulombola kudiza mumukanda wunakwila nawu Difukulenu Kudi Nzambi?

³ Neyi munakulombola kudiza mumukanda wunakwila nawu Difukulenu Kudi Nzambi nawa mudi dehi mutupetulu twakukumishaku, munateli kumanisha mukanda weniwu nakumukolesha kadizi kutaña nkawindi mukanda wunakwila nawu “Shakamenu Mukukeña kwaNzambi.” Neyi kanda mushiki hahalehi, chikuwaha neyi mukutachika kudiza mumukanda wawuha kutachikila kumatachikilu. Kufwana mukanda wunakwila nawu Chatañishaña Bayibolu, neyi munakeñi munateli kuhanjeka nsañu yidi muapendikisi hela nehi.

4. Chumanyi chitwatela kwila neyi kadizi wetu yopapatishewa henohu kanda yomanishi mukanda wunakwila nawu Chatañishaña Bayibolu ni “Kukeña kwaNzambi”?

⁴ Neyi kadizi napapatishewi henohu kanda yomanishi nyikanda yejima yiyedi, mwatela kutwalekahu kudiza sampu munamanishi mukanda wunakwila nawu “Shakamenu Mukukeña kwaNzambi.” Hela chakwila kadizi wapapatishewa, mwatela kuchinda mpinji, kufuntila, nikudiza. Mukwakushimwina yimukuzata nindi nawa wukuhoshahu hakudiza niyena watela kuchinda mpinji.

5. Indi mukanda wunakwila nawu “Kukeña kwaNzambi” anateli kuwuzatisha ñahi hakukwasha akwakushimwina aleka dehi kuzata mumudimu wamwiha hampinji yayilehi?

⁵ Neyi anayileji kudi mana kwetu waMukomiti yaMudimu yaChipompelu nawu mudizeña Bayibolu namuntu wunazeyi mumudimu wakushimwina, anateli kuyileja tupetulu tumwatela kudiza mumukanda wunakwila nawu “Shakamenu Mukukeña kwaNzambi.” Himwatela kudiza hampinji yayilehi nawantu amuchidiwuku. Tukweti nsañu yayiwahi hama muniwu mukanda wawuha, wunasonekuwu kulonda kutukwasha kushakama “mukukeña kwaNzambi.”—Yuda 21.

[Tumazu twaheshina]