Dizishenu Antu Abula Kwilukisha Kutaña
1. Kukalanyi kutunateli kumona mumudimu wakushimwina?
1 Mpinji yikwawu neyi tunakushimwina twekalaña nakukala kwakutañisha nsañu yalala kudi antu abula kwilukisha kutaña. Chumanyi chitwatela kwila?
2. Munjilanyi mutwalemeshelaña antu abula kwilukisha kutaña nawa muloñadi?
2 Yilemeshenu: Yehova hatalaña shikola yatañayi muntuku, watalaña muchima wamuntu. (1 Sam. 16:7; Yish. 21:2) Dichi, hitwadiwulaña antu abula kwilukisha kutañaku. Neyi tuwundisha muchima nikuyilemesha, antu amuchidiwu anateli kwiteja kuyikwasha. (1 Pet. 3:15) Hichinayi mukwila nawu tumushinjileña muntu kutaña nsona hela parakalafuku. Neyi muntu yatwalekahu kudiza nsañu yalala yalema yamuBayibolu, watela kufwila kwilukisha kutaña kulonda atiyeña muzañalu wafumaña mukutaña Izu daNzambi ‘nakutoñojoka nimwaana niwufuku.’—Mas. 1:2, 3.
3. Jinjilanyi jakutañishilamu jitwatela kuzatisha hakudizisha antu abula kwilukisha kutaña?
3 Jinjila Jashiyashana Jakutañishilamu haKudiza Bayibolu: Nyevulu hinjila yayiwahi yakutañishilamu antu nikuyikwasha kwanuka yuma yanadizuwu. Mwatela kumwihula kadizi chuma chinakumonayi hamwevulu mumukanda yimunakudizamu. Kufumahu zatishenu malwihu atelela kulonda kumukwasha kwiluka chuma chinakutañisha mwevulu. Zatishenu nsona yinakudizisha yikuma yimunakukeña kulumbulula hamwevulu. Mwatela kuzatisha cheñi nyevulu hakuhituluka muyuma yimunadizi. Bayi mudiza yuma yayivulu hampinji yimuku. Konkomwenenu mutu wampanji niyikuma yamaneni yayuma yimunakudiza, nawa bayi muhanjeka yikuma yinabuli kwikala munsañu yimunakudizaku. Tañenu nsona muBayibolu, nawa zatishenu malwihu kulonda mwiluki chikupu nenu kadizi natiyishi nsañu yimwataña. Chumichi chinateli kusañumuna mpwila yindi yakukeña kwilukisha kutaña kulonda yakeñeña nsañu yalala yayivulu muBayibolu nkawindi.
4. Tunateli kukwasha ñahi kadizi ketu kwilukisha kutaña?
4 Yuma Yakwashanaña Kwilukisha Kutaña: Antu abula kwilukisha kutaña hela abulili kwikala nampinji yeneni yakudiza kutaña chiwahi anateli kutiyisha nikwiluka nsañu chiwahi chikupu. Mwatela kukolesha antu amuchidiwu kutiyilila chikupu neyi antu elukisha kutaña anakutaña henohu anakulondela mumukanda wawu, nawa atela nikufuntuluka mumazu nakutoñojokahu. Chumichi chinateli kumukwasha muntu kwilukisha kutaña. Cheñi, buloshuwa yaApply Yourself to Reading and Writing yinateli kumukwasha. Mumaluña amakwawu, aeluda anateli kuloñesha mashikola akudizisha kutaña muchipompelu. Iji njila jajiwahi jinateli kutukwasha hampinji yitunakukwasha antu abula kwilukisha kutaña nikutiya “nyikanda yajila,” yinateli kuyileñela ekali namaana akupuluka.—2 Tim. 3:15.