Chakukwasha Antu Abula Kwilukisha Kutaña
1. Kukalanyi kwekala hakutañisha antu abula kwilukisha kutaña?
1 Enimatala abula kwilukisha kutaña anateli kukeña kudiza nsañu yaNzambi, ilaña Bayibolu ninyikanda yikwawu yinateli kuyichinisha. Neyi tuyinka antu amuchidiwu mukanda waChatañishaña Bayibolu halwendu lwatachi anateli kukaana. Tunateli kuyikwasha ñahi kumwiluka Nzambi? Twehwili chelañawu akwakushimwina akuluka yitembi akumatuña akubadika ha 20. Yuma yinalondeluhu diyi yashimwinuwu.
2. Nyikandanyi yazatikaña chiwahi hakukwasha antu abula kwilukisha kutaña?
2 Neyi kadizi welukisha wanyi hela heluka kutañaku, munateli kutachika nabuloshuwa yaMutiyililenu Nzambi hela Mutiyililenu Nzambi Kulonda Mwakahandi Haya Nyaka. Payiniya wumu wakuUnited States walejaña muntu mabuloshuwa ejima ayedi nakumwihula kulonda yatonduhu yinakukeñayi. Kasanji kamutayi kakuKenya kashimwini nawu awa mabuloshuwa anakuzatika chiwahi muAfrica, muloña antu ayidizishaña kuhitila mukuyileja mpanji kubadika kuyihujola malwihu. Hela chakwila muntu wataña nateli kwiteja kutaña nakumwihula malwihu, iyi njila hiyanateli kumukwasha muntu wabula kwilukisha kutañaku. Neyi kadizi welukisha kutaña wanyi, akwakushimwina amavulu akeñaña kutachika nabuloshuwa yaNsañu Yayiwahi Yinafumi Kudi Nzambi, Wunatweshi Kwikala lbwambu daNzambi, hela Mukanda Wami waMpanji Jamu Bayibolu.
3. Chumanyi chitwatela kwiluka hakwila tuyidizishi chiwahi antu abula kwiluka kutaña?
3 Yihamekenu: Antu abula kwiluka kutaña anateli kutiya nsonyi nawa adimonaña nawu ashikilamu wanyi. Njila yatachi yitwatela kuyidizishilamu chalala hikuyikwasha kulonda adimoneña nawu alema. Antu amavulu abula kwiluka kutaña ekala namaana nawa anateli kudiza. Atela kwiluka nawu mwayilemesha chikupu. (1 Pet. 3:15) Neyi eluka nawu anakuzata nañovu nawa anakwiluka yuma yinakudizawu hadi Nzambi, akutwalekahu kudiza. Dichi mwenda muyihameka chakufuma hamuchima.
Antu abula kwiluka kutaña anateli kutiya nsonyi nawa adimonaña nawu ashikilamu wanyi. Njila yatachi yitwatela kuyidizishilamu chalala hikuyikwasha kulonda adimoneña nawu alema
4. Tunateli kukolesha ñahi antu abula kwilukisha kutaña hakwila aloñesheña nsañu yakudiza?
4 Hela chakwila kadizi welukisha kutaña wanyi, mukoleshenu kulonda yaloñesheña yuma yinakudizayi. Akwakushimwina amakwawu muSouth Africa alejaña atudizi kuleja ntaña yawu hela ibwambu dawu weluka kutaña kulonda ayikwashi atudizi. Mukwakushimwina wakuBritain wakoleshaña atudizi indi kuloñesha kuhitila mukuyinka mukanda windi awuzatishi hamaparakalafu antesha hampinji yakudiza kulonda amoni nawu chaswayi kuwana ñakwilu neyi anafundumu. Mana kwetu wumu wakuIndia walejelaña chadimu atudizi indi kutala nyevulu yidi munsañu yakadizawu mulungu wukalondelahu nikutoñojokahu chikupu.
5. Tunateli kwikala ñahi adiwunjika neyi tunakumudizisha muntu?
5 Diwunjikenu: Hichikweti muloña namukanda wumunakuzatishaku, shenu maana hayikuma yamaneni, nawa kwashenu atudizi enu kutiyisha yikuma. Kumatachikilu, chikuwaha neyi muhanjekaña hadi jiminiti 10 nakushika ku 15. Bayi mudiza nsañu yayivuluku, hadaha munateli kudiza hohu maparakalafu antesha hefuku. Diwunjikenu neyi kadizi nakutaña chovu-chovu. Hadaha wukukeña kwilukisha kutaña hampinji yinakulemeshayi yuma yinakudizayi hadi Yehova. Hakwila mumukwashi kadizi wenu kwila mwenimu, chikuwaha neyi mumutambika kulonda enzi kukupompa chimwatachika kudiza.
6. Tunateli kukwasha ñahi antu kwiluka kutaña?
6 Neyi atudizi aBayibolu eluka kutaña, akwiluka swayi-swayi yuma yinakudizawu hadi Nzambi. (Mas. 1:1-3) Akwakushimwina amavulu akwasha atudizi kwiluka kutaña kuzatisha mukanda wunakwila nawu Apply Yourself to Reading and Writing hajiminiti jantesha neyi amanisha kudiza mulungu nimulungu. Neyi kadizi atiya kutama, hadaha munateli kumukolesha kuhitila mukumuleja yuma yadizayi. Mulejenu chikupu nenu Yehova wukumukwasha neyi azata nañovu, nawa mukoleshenu yalombeña kudi Nzambi kulonda amukwashi. (Yish. 16:3; 1 Yow. 5:14, 15) Akwakushimwina amakwawu kuBritain akoleshaña atudizi awu kwikala nayikonkwanyi yikuyikwasha kuyilaku hambidi chidi neyi kusambila kudiza nsona jaalufwabeti, kuhiñahu ayilejaña chakuwana nikutaña nyikanda yamuBayibolu, nikutaña nyikanda yapela yashindamena haBayibolu. Kuyikwasha antu kudiza chakutaña chakeñekaña kuyisañumuna kukeña kwiluka, bayi kuyidizisha hohu chakutañaku.
7. Muloñadi chitukubulila kushintajala kutachika kudizisha chalala antu abula kwilukisha kutaña?
7 Yehova hasekeshaña antu abula kudiza shikola yakumujimbaku. (Yoba 34:19) Yehova washinshikaña muchima wamuntu. (1 Kushi. 28:9) Dichi bayi mushintajala kuleja nsañu yalala antu abula kwilukisha kutañaku. Mukweti nyikanda yayivulu yayiwahi yinateli kuyikwasha kutachika kudiza nawu. Chimwahita mafuku, munateli kutachika kudiza nawu mumukanda waChatañishaña Bayibolu nawa wukumukwasha kwiluka Nyikanda Yajila.