Tañishenuña Munjila Yapela
1. Njilanyi yalema yakutañishilamu chiwahi chikupu?
1 Kutañisha munjila yapela hichuma chalema nankashi hakukwasha antu kudiza. Kushinshika hanjila yatañishilileñamu Ntañishi Muneni Yesu, kunateli kutukwasha kuwahisha ‘ntañishilu yetu.’—2 Tim. 4:2; Yow. 13:13.
2. Chumanyi chakeñekaña hakutañisha munjila yapela, nawa kutañisha munjila yamuchidiwu mwafumañadi?
2 Hoshenuña Munjila Yapela: Mpanji yahaMpidi yikweti nsañu yakunama chikupu yahosheluwu munjila yapela. (Mat., tupe. 5-7) Mazaza amutiyilileña Yesu ‘ahayamini njila yatañishilileñamu.’ Mazu aYesu ashikili hanyichima yawatulama atemesheluwu nawu amukwati chakwila ahosheli nawu: “Hikudi muntu wahoshahu dehi neyi iwuku.” (Mat. 7:28, 29; Yow. 7:46) Hitwatela kuzatisha mazu akala, nhoshelu yakunama, hela yakutalilahu yakala hakwila nawu nsañu yalala yishiki hanyichima yawantuku. Tunateli kulumbulula chiwahi nsañu yalala kuhitila mukuzatisha mazu apela.
3. Muloñadi antu amakwawu chatañishilañawu antiyilili jawu nsañu yayivulu, nawa tunateli kutondolwela ñahi chaaku chenichi?
3 Ilukenu Kuvula kwaNsañu Yimwatela Kutañisha: Yesu wadiña nakutoñojokelaku izaza dindi nakwiluka kuvula kwansañu yatela kuyitañishayi hampinji yimu. (Yow. 16:12) Twatela kwiluka nikuhimpa ntañishilu yetu kwesekeja nawantu yitunakutañisha, sweje-e neyi tunakushimwina antaña, amaha, hela anyana. Hitwatela kuyileja nsañu yayivulu hela chakwila anakumwekana nawu anakutiyilila chikupuku. Antu ashinshika akatwalekahu kudiza nsañu yaNzambi walala, Yehova.—Yow. 17:3; 1 Kor. 3:6.
4. Muloñadi chichawahila kushinshika hayikuma yamaneni kubadika kutala hansañu yayivulu?
4 Shenu Maana Hayikuma Yamaneni: Yesu helishileña nsañu yatañishileñayi kwikala yakola kuhitila mukushamu nsañu yayivuluku. Hampinji yahosheliyi nindi: “Antu ejima adi mumajamu . . . akedikamu,” hiyadiña mpinji yakushimuna nsañu yayivulu kutalisha hayuma yiyedi yikamwekena ana akasañukaku. (Yow. 5:28, 29) Neyi tunakulombola kudiza kwaBayibolu, twatela kusha maana hayikuma yamaneni nakutondolwela chaaku chakuhosha nsañu yinabuli kwikala mumukanda.
5. Nkiswinyi yitunateli kutambwila neyi tutañishaña munjila yapela?
5 Tukweti muzañalu chikupu muloña Yehova watutañishaña munjila yapela yuma yejima yitwakeñaña kwiluka. (Mat. 11:25) Mwani wejima wetu tutañisheña munjila yapela kulonda twikali namuzañalu wafumaña mumudimu wakushimwina.