Yuma Yisatu Yikuyikwasha Kuwahisha Ntañishilu Yenu
1. Muloñadi chitwafwilaña kuwahisha ntañishilu yetu?
1 Akwakushimwina ejima hiyantañishi. Hela chakwila tunayuku lwendu lwatachi, kufuntilaku nakusañumuna mpwila yamuntu hela tunakulombola kadizi waBayibolu, twadizishaña antu nsañu. Nawa nsañu yitwatañishaña yekala yalema. Twalumbululaña “nyikanda yajila” yinatweshi kuleja antu “maana akumona nachu wamwinu.” (2 Tim. 3:15) Iku hikukooleka kwabadika! Iyi yuma yisatu yikutukwasha kuwahisha ntañishilu yetu.
2. Tunateli kutañisha ñahi munjila yapela?
2 Kutañisha Munjila Yapela: Neyi tweluka nsañu chachiwahi tunateli kuvulamenaku netu iyi nsañu yinateli kumukalila muntu wabula kuyiluka. Dichi neyi munakudizisha kadizi Bayibolu bayi musweja kuvulisha nsañuku. Ilaña konkomwenenu hohu hayikuma yamaneni. Kutañisha chiwahi hikwaya mukwila nawu musweji kuhoshaku. (Yish. 10:19) Chachiwahi kutaña hohu nsona yinakukonkomwena hachikuma. Hanyima yakutaña nsona, konkomwenenu hohu hachikuma chinakundami kunsañu yimunakuhanjekahu. MuMpanji yaHampidi yasonekawu haMatewu kapetulu 5 nakushika kukapetulu 7 mwekala nsañu yalala yalema, hela chochu Yesu watañishili munjila yapela nawa watondeli mazu antesha hohu.
3. Muloñadi chichalemena kuzatisha yakutalilahu ninyevulu nawa yakutalilahwinyi ninyevulu yinateli kuzatika chiwahi?
3 Yakutalilahu niNyevulu: Yakutalilahu ninyevulu yaleñelaña antu kutoñojoka chikupu nawa yakwashañaku kwanuka nsañu. Bayi mutoñojoka nenu chiña mwikala akatwa mpanji hakwila nawu mushimuni yakutalilahu yayiwahuku. Kakavulu Yesu wazatishileña yakutalilahu yayihi nawa yapela. (Mat. 7:3-5; 18:2-4) Nyevulu yapela yakuleña hachipapilu niyena yinateli kukwashana chikupu. Neyi muloñeshela chadimu, chikuyikwasha kutoñojoka yakutalilahu ninyevulu yayiwahi.
4. Tunateli kuzatisha ñahi malwihu chiwahi?
4 Malwihu: Malwihu aleñelaña kadizi wenu kutoñojoka. Dichi mwatela kudiwunjika neyi munehuli lwihu. Neyi mulusukila kumuleja ñakwilu, mukwiluka wanyi neyi chakwila kadizi wenu natiyishishi hela nehi. Neyi yakula mwaheña, chikuwaha kumwihula malwihu amakwawu anateli kumukwasha kwakula chiwahi, chatela kumwolola hohu. (Mat. 17:24-27) Hela chochu, wejima wetu hitwekala antañishi awaninaku. Dimuloña waweni Bayibolu chiyatukoleshelaña kusha maana chikupu kuntañishilu yetu. Neyi twila mwenimu tukekala nankisu yahaya nyaka niantu akututiya.—1 Tim. 4:16.