Progiramu Yefuku daKupompa Kwadimena kwamu 2010
1. (a) Hamafuku akupompa kwadimena kwahanyima, twadizili nyitwinyi yashindamena muNsona? (b) Komana kuduhu yikuma yamaneni yahakupompa kwamafuku adimena yayikwashili mumudimu wenu wakushimwina?
1 “Shinshikenu Yuma Yabadika Kuwaha,” “Imanenu Mbe Neyi Mukanka Wumu,” “Twalekenuhu Kushimwina Nsañu Yalala,” “Etu Yetu Iwumba—Yehova Diyi Kañemi Ketu.” (Fwi. 1:9, 10, 27; Yow. 18:37; Isa. 64:8) Iyi hinyitu yantesha hakachi kanyitu yahosheweli hamafuku akupompa kwadimena kwahanyima. Komana munakufwila kuya nakupompa kupompa kwefuku dadimena kwachaaka chamudimu cha 2010? Mutu wampanji wakahoshaña nawu: ‘Mpinji Yinashaluku Yinakehi Dehi,’ kufuma ha 1 Akorinda 7:29.
2. Tunateli kusañumuna ñahi mpwila yakuya nakupompa?
2 Tachikenu kuhanjeka haprogiramu yefuku dakupompa kwadimena namuzañalu kufuma tuhu ifuku dakabidikawu muchipompelu chenu. Anvwali amakwawu akwashaña anyanawu kutalila kupompa kuhitila mukusoneka ifuku dakupompa hakalenda kachisaka, kusoneka yuma yinakukeñeka nikuchinda mafuku. Hampinji yaKudifukula kwaChisaka kwamelela, munateli kuhituluka munsañu yimwasonekeli hamafuku akupompa kwadimena kwahanyima. Munateli kuloñesha nyichima yenu kuhitila mukuhituluka mumukanda waNonkelenimo mu Masambililo ya Isukulu lya Butumikishi Ilya Bulesa, mafu 13-16, kulonda wuyikwashi nichisaka chenu kwikala ‘ababala mukutiyilila.’—Luka 8:18.
3. Tukahetelamu ñahi mujimpanji jikahoshewa hakupompa?
3 Zatishenu Yuma Yimwadizaña: Hanyima yakupompa antu avula kuhosha nawu, “Kupompa kunawahi!” Dichekalaña kupompa kwejima, muloña kwekala hakachi kayuma yayiwahi yatuloñeshelañayi Yehova. (Yish. 10:22) Hakwila nawu mazu asoñi nyikabu, mwatela kuyitoñojoka nikuyihemba. (Luka 8:15) Neyi himukufunta kwitala hanjekenuña hayuma yimunadizi kukupompa nachisaka chenu hela nawakwenu. Hanjekenu hayikonkwanyi yimukweti niyikuma yatela kuyikwasha mumudimu wakushimwina. Kwila mwenimu kukayikwasha kuhetelamu muniyi nsañu hadi yaaka yayivulu.—Yak. 1:25.
4. Indi iku kupompa kwalemenadi kudi etu?
4 Twatiyaña kuwaha neyi tutambwila chawaana chitunakankili. Komana hitukuchiñilila chikupu yuma yinatuloñesheliyi Yehova hefuku dakupompa kwadimena kunalondeluhuku? Tunateli kukuhwelela netu kukatukwasha muyuma yejima. Twatela kukuhwelela kutambwila chawaana chachiwahi kufuma kudi Tata yetu wamwiwulu, Yehova, kuhitila mukutukolesha nikutudizisha chakuzata mudimu watwinkayi.—2 Tim. 4:2; Yak. 1:17.