Kushinda Kukala kwaKushimwina Amayala
1. Kukankilanyi kweneni kunakukeñeka kwakwakamena yuma yaWanta?
1 Chineli mudimu waWanta wunakuyilaku hambidi munanu mafuku akukuminina, kudi kukankila kweneni kwawamayala ashikahu kuspiritu atela kulombola. (Maku 4:30-32; Yil. 20:28; 1 Tim. 3:1-13) Kumaluña amakwawu ambanda amavulu etejaña nsañu yaWanta kubadika amayala. Kumaluña amakwawu, amayala atoñojokaña nawu añodijawu diwu akweti mudimu wakufumba anyana nsañu yamunsakililu. Tunateli kukwasha ñahi amayala amavulu kulonda ashi muchima kuyuma yakuspiritu kulonda twikali nawu mukudifukula kwalala?
2. Indi mudimu wazatiluwu aPawulu niPetulu wakushimwina kudi amayala wasoñeli ñahi nyikabu yayiwahi?
2 Keñakeñenu Amayala: Neyi mutu wetala yeteja chalala, wavula kukwasha ejima muchisaka kulonda ekali mukudifukula kwalala. Chakutalilahu, chayikasiluwu aPawulu niSilasi mukaleya hamuloña wakushimwina, amushimwinini mukwakuhemba kaleya. Ona iyala nichisaka chindi ayipapatishili. (Yil.16:25-34) Hamuloña wakushimwina kwaPawulu muKorinda, “Nyuli yashikoloyu Kirisipu hakumukuhwelela Mwanta nawakwetala dindi ejima.” (Yil. 18:8) Yehova wamuzatishili Petulu kumushimwina Konelisu, mukulumpi wamashidika ateneneñawu nawu “muntu wukweti kalemesha kakulemesha Nzambi, waakamaña Nzambi.” Konelisu, niantaña jindi nialunda nindi adikundiliyi nawu, ayipapatishili.—Yil. 10:1-48.
3. Kufwana Fwilipu, muntu wamuchidinyi ‘walema’ imwatela kushimwina?
3 Kushimwina antu “alema” kunateli kusoña nyikabu yayiwahi. (1 Tim. 2:1, 2) Chakutalilahu, kañelu kaYehova wamulejeli Fwilipu kuhosha ‘namuntu walema’ watalileña yikumba yonsu yamwanta wamumbanda wawaEtiyopiya. Fwilipu wamutiyili iwu iyala ‘nakutaña nañovu mukanda wakaprofwetu Isaya,’ hakuya nakumulumbulwila nsañu yayiwahi yaYesu. Iwu kaEtiyopiya wekalili kambanji hadaha watachikili kushimwina nsañu yayiwahi hampinji yafuntileñayi kumukala windi. Hekwawu wamushimwinini mwanta wamumbanda niañuvulu jamwanta, hadaha niantu abulileña kwikala nampinji yeneni yakutiya nsañu yayiwahi.—Yil. 8:26-39.
4. Tunateli kwinka ñahi amayala kukooleka kweneni kwakutiya nsañu yayiwahi?
4 Chakuwana Amayala Amavulu: Chineli amayala avula kwikala kumudimu namwaana, kwila muloñesha kulonda muvuleña kushimwina namelela, kunsa yamulungu nihamafuku akunooka nehi? Kuvula kuzatila kumaluña anyidimu kukuyileñela kushimwina amayala ekalaña hamatala chakamu nakamu. Amana kwetu niwena atela kuzata nañovu kulonda ashimwineña wunsahu wamumpanji kudi amayala mwazatilañawu. Mumudimu wakwitala nikwitala, sweje-e mwiluña dinazatiluwu nankashi, mpinji jikwawu amayala atela kuhosha nawu anakukeña kuhosha namutu wetala.
5. Indi muhela watela kwiladi neyi iyala wunashimwiniyi wudi nampwila yakudiza nsañu yaWanta?
5 Muhela bayi yafunta nkawindi nakudizisha iyala wamwekesheli mpwila yakudiza chalalaku. Watela kuya namfumwindi hela namukwakushimwina mukwawu. Neyi owu iyala wukupaminaku, kakavulu chawahaña neyi mukumuhana kudi mana kwetu wakuluka yitembi.
6. Tunateli kumwimbujola ñahi kapostolu Pawulu kulonda tutweshi ‘kukokola antu amavulu’?
6 Sakulenu Mpanji Jakeñawu Amayala: Kapostolu Pawulu welukileña antu ahosheleñayi nawu nawa welukili nichakuhanjeka nawu kulonda ‘yokokoli nachu antu amavulu.’ (1 Kor. 9:19-23) Anetu nawa twatela kusakula mpanji jatela kukokola amayala itukuwana nawa twatela kuloñesha chiwahi. Chakutalilahu, amayala akamenaña kukala kwamali, nfulumendi yayiwahi, nikukiña chiwahi chisaka chawu. Atiyaña cheñi kuwaha kwiluka muloña wutwekalilaku, yuma yakamwekena iseki kumbidi, nichetejelayi Nzambi makabi. Nsañu yaWanta yitwashimwinaña akuyiteja chiwahi neyi twiluka chikupu mwakuhoshela.—Yish. 16:23.
7. Indi antu ejima muchipompelu anateli kukwasha ñahi amayala abula kwitiya anenzi nakupompa?
7 Wanenu Njila Yakukwashilamu Amayala Abula Kwitiya: Hela chakwila yililu yayiwahi yamwekeshañawu ahela akwaKristu kakavulu yakokolaña amfumujawu abula kwitiya, akwachipompelu niwena anateli kuyikokola. (1 Pet. 3:1-4) Neyi iyala wabula kwitiya yoya nañodindi kuchipompelu, chipompelu chikuhana wunsahu waweni neyi chimutambwila nachisambu. Neyi yenza nakupompa, hadaha wudi namuchima wakudiza chalala, nawa nateli kwiteja kudiza Bayibolu.
8. Indi amana kwetu anateli kukukwasha ñahi amayala abula kwitiya anamwekeshi mpwila yantesha yakudiza chalala?
8 Cheñi, amayala amakwawu hiyamwekeshaña mpwila yayeni yakuspiritu hohenohuku, ilaña kumbidi aketeja kuhanjeka nsañu yamuBayibolu namana kwetu wunakeñuwu. Amana kwetu muchipompelu chimu azatileña nañovu mpinji yejima yendeleleñawu chisaka mwadiña iyala wabula kwitiya kulonda kuhanjeka nindi yuma yelukiluwu nawu yikumuzañalesha. Nkumininaku, atachikili kumudizisha Bayibolu, chayinu mpinji wapapatishewa dehi. Chakutalilahu chikwawu, mana kwetu wakwashili iyala wabula kwitiya wachisambu kusha ikoli kwitala dindi. Kuhitila mukumwekesha kukeña kwamuchidiwu, ona iyala watachikili kudiza Bayibolu. (Ŋal. 6:10; Fwil. 2:4) Neyi wudi mana kwetu mukwaKristu, kwila mwikala namuchima wakukwasha amayala abula kwitiya nehi?
9. Yumanyi yafumañamu neyi amayala akwaKristu ayidizisha?
9 Yidizishenu Kulonda Akekali naKukooleka Kumbidi: Amayala etejaña nsañu yaWanta nikukeña kwikala nanyidimu mumudimu waYehova ekalaña ‘yamukunkulu mudi antu,’ aeluda akwaKristu azatishaña wuswa wukwetiwu kukoola chipompelu chawantu jaYehova. (Efwes. 4:8; Mas. 68:18) Amayala wenawa abiñaña chipompelu chakadi kuyikanjikija nawa nakukeña. (1 Pet. 5:2, 3) Amayala wenawa hinkisu yayeni kudi ana kwawu ejima.
10. Indi mudimu wazatiliyi Ananiya wakukwasha Pawulu wunakwashi ñahi antu amavulu?
10 Chakutalilahu, hela chakwila wayimwesheleña akwaKristu kañalaña, Sawulu wekalili ‘kapostolu kawenimatuña.’ (Rom. 11:13) Dihafumini kambanji Ananiya hakushintajala kumushimwina Sawulu muloña wawulumbu. Hela chochu, Ananiya wakoñeli mwamulejeluwu kudi Mwanta nawa wamushimwinini iwu iyala wekalili kapostolu Pawulu. Chimwahitili yaaka, mudimu waPawulu wakwashili antu amavulu amutiyileña nakushimwina cheñi niyihita yawantu anakutwalekahu kuzatisha nyikanda yindi yonenewa yasonekawu Mwizu daNzambi.—Yil. 9:3-19; 2 Tim. 3:16, 17.
11. Muloñadi chitwatela kuhimpila nzatilu yetu kulonda tutweshi kushimwina amayala?
11 Dichi tutwalekenuhu kuhimpa munzatilu yetu kulonda tushindi kukala kutwamonaña hakushimwina amayala. Neyi twila mwenimu, tukatambwila nkisu yaYehova hamuloña wakudikita nañovu hakwila nkeñelu yindi nikwakamena chikupu mudimu waWanta.