Munateli Kukwasha Ñahi Antu Abula Kwitiya Akweti Enikwawu Etiya?
1. Muloñadi antu ejima muchipompelu chakeñelañawu kukwasha antu abula kwitiya ekala mumaluwi nawakwaKristu adizi chalala?
1 Komana muchipompelu chenu muduhu akwakushimwina adi nawenikwawu abula kwitiya? Neyi adi mwomu, chakadi nikujina awa kwakushimwina akeñaña nawu enikwawu enzi mukudifukula kwalala. Ilaña bayi neyi wena hohu diwakeñaña nawu enikwawu adizi chalalaku. Neyi chochakeñañayi Nzambi, chipompelu chejima chafwilaña nawu ‘antu ejima ahandi, eluki nsañu yalala chikupu.’ (1 Tim. 2:4) Tunateli kuzata ñahi nañovu kulonda tukwashi antu abula kwitiya asumbula hela asumbuka nawakwakushimwina muchipompelu chetu?
2. Indi kashinshi kanateli kutukwasha ñahi hakukwasha muntu wudi mumaluwi wabula kwitiya?
2 Chuma chatachi, twatela kufwila kwiluka yitoñojoka yamuntu wabula kwitiya. Antu amavulu abula kwitiya asumbula hela asumbuka namukwaKristu akeña yisaka yawu nawa afwilaña kumwekesha yililu yayiwahi mumaluwi nikwikala anvwali amawahi. Hadaha yuma yakuhwelelawu munsakililu yawu yambuka nayitwakuhwelelamu. Hekwawu hiyayilukisha chachiwahi aYinsahu jaYehovaku, ilaña ayilejeli wunsahu wakutwamba kudi akwawu ekala nachaambu. Amakwawu ahilashanaña nawenikwawu hamuloña wakwila mpinji yakushakama hamu nachisaka diyayañawu nakudifukula. Kashinshi kanateli kutukwasha kwila kakawahi kudi antu abula kwitiya nikuyilemesha nawa hitukutiyaña woma hampinji yitudi nawu hamuku.—Yish. 16:20-23.
3. Njilanyi yayiwahi yakukokwelamu muntu wabula kwitiya?
3 Kuyisha Maana: Njila yayiwahi yakukokwelamu muntu wabula kwitiya wukweti mwinikwindi wetiya kulonda yadizi chalala, yakutachikilahu, yidi yakumwekesha yililu yayiwahi, bayi kuhitila mukuhanjeka nsañu yamuBayiboluku. (1 Pet. 3:1, 2) Chuma chalema nankashi twatela kuyisha maana. Ahela muchipompelu atela kusha maana kudi mumbanda wasumbuka wabula kwitiya, nawa amana kwetu atela kusha maana kudi iyala wabula kwitiya. Munjilanyi?
4. Indi antu abula kwitiya tunateli kuyisha ñahi maana?
4 Neyi kanda mumwiluki mwinikwawu, hadaha munateli kumwiluka kuhitila mukusambila kuhanjeka namwinikwawu mukwaKristu. Bayi chiyineñesha neyi mwinikwawu wabula kwitiya hakusambila yamwekesha kadiwuku. Kuyimwekeshela chisambu nikuyisha maana kunateli kuyileñela eluki nawu aYinsahu jaYehova ekala chachiwahi. (Rom. 12:20) AkwaKristu amakwawu apama atambikaña muntu wabula kwitiya nichisaka chindi kwitala dawu kulonda adyi nawu, afwilaña kudiluka chachiwahi nikumanisha chaambu chinateli kwikala hakachi kawu. Ahoshaña hayuma yamutiyishaña kuwaha, bayi kuhanjeka hayuma yakuspiritu. Mukuhita kwampinji, muntu wabula kwitiya chekalayi wakasunuka, diyi mpinji yakuhanjeka hansañu yamuNsona. Hadaha nateli kwiteja kwinza kukupompa kwetu kulonda yamoni yuma yinakudiza mwinikwindi, chineli weluka dehi antu amakwawu muchipompelu. Hela chakwila hanakukeña kwiluka chalalaku, twatela kumuhameka hamuloña wakukwasha mwinikwindi wetiya.
5. Aeluda anateli kukwasha ñahi muntu wabula kwitiya wukweti mwinikwindi wetiya?
5 Sweje-e aeluda atela kukwasha antu adi mumaluwi abula kwitiya nikuwana njila yakuyishimwina. Muntu wabula kwitiya wakaanaña kuhanjeka hansañu yamuBayibolu nateli kutiyilila mazu akumukolesha amuNsona neyi anamutenteki muchipatela hela nakumona kukala kweneni kwayikatu yakumujimba. Neyi chisaka chambokela munsakililu chidi mukukala, hadaha anafwishi muntu muchisaka, aeluda anateli kutambika muntu wabula kwitiya yashakami hamu chisaka hakuyikundeja.
6. Yumanyi yatela kutuleñela tukwashi muntu wabula kwitiya wukweti mwinikwindi wetiya?
6 Toñojokenu hamuzañalu wukutiya mukwaKristu muchipompelu chetu neyi mwinikwindi yadiza chalala! Ichi chuma chachiwahi chinateli nikuzañalesha chikupu Yehova, añelu, nichipompelu chejima. (Luka 15:7, 10) Hela chochu, neyi muntu wabula kwitiya hakusambila yakaana, tunateli kuzañalala netu kuzata kwetu nañovu kwamuzañaleshaña Yehova, ‘wabulaña kukeña nindi muntu niwumu yanoñi, wakeñaña antu ejima abalumuki munyichima.’—2 Pet. 3:9.
[Mazu ekoku adi hefu 6]
Njila yayiwahi yakukokwelamu muntu wabula kwitiya wukweti mwinikwindi wetiya kulonda yadizi chalala, yakutachikilahu, yidi yakumwekesha yililu yayiwahi, bayi kuhitila mukuhanjeka nsañu yamuBayiboluku