Zatishenuña Bayibolu Chachiwahi
1. Indi Bayibolu yatukwashaña munjilanyi?
1 Kuzatisha chachiwahi Izu daNzambi donenawu kwatukwashaña kushimwina nikutañisha chalala chatiyakana nikusolola ntañishilu yakutwamba nitushidikilu twawantu.—2 Tim. 2:15; 1 Pet. 3:15.
2. Chumanyi chikutukwasha kumona jinsona swayi?
2 Ilukenu Bayibolu Chachiwahi: Hakwila nawu muzatishi chozelu chidi chejima, mwatela kuchiluka chachiwahi. Kutaña Bayibolu yejima kukuyikwasha kwiluka mutu wansañu yamuBayibolu. Chumichi chikuyikwasha cheñi kwanuka nsona nikuyimona swayi. Chimwasweja kwiluka jiNsona, mukwikala ahamuka chikupu mukuhosha neyi munakushimwina mwiha nimuwunsahu wamumpanji.—1 Tesa. 1:5.
3, 4. (a) Njilanyi jatela kutukwasha kwilukisha Bayibolu? (b) Mwazatishahu dehi jinjila jikwawu kulonda mwilukishi jiNsona?
3 Ikalenu nachaaku chakubakula Bayibolu yenu nikutaña hampinji yakupompa. Neyi munakudiza halwenu nikuloñesha kupompa kwachipompelu, tañenu jiNsona jinatenuwu nikutoñojoka chakujizatisha. Amavulu eluka nawu kutaña nsona yamuBayibolu muBayibolu yayeni chaswayi kumona nsona neyi adi mumudimu wakushimwina kubadika kutañila hakompyuta hela hachipapilu.—Yow. 14:26.
4 Yisaka yikwawu yekalaña nampinji yakudiza kulonda ahembeleña nsona jamuBayibolu kumutu. Munateli kwila chumichi kuhitila mukuzatisha yipapilu hadi nsona jinatenuwu kabadi kamu, kabadi kekwawu kudi mazu aweni. Adihimpaña kuhitila mukuzatisha iyi yipapilu kulonda eluki neyi anatweshi kusombolola jinsona hela kwiluka hijekala. Kuhituluka munsañu yakuhosha hakushimwina nikwakula malwihu kuhitila mukuzatisha Bayibolu kukutukwasha cheñi kwilukisha Bayibolu.
5. Muloñadi wutukukeñela kwilukisha Bayibolu?
5 Kwosi mukanda walema kubadika Bayiboluku. Yikweti hohu nsañu yinateli kuletesha antu kwikala ‘namaana akumona nachu wamwinu.’ (2 Tim. 3:15) Chineli antu amavulu mwiluña detu hiyeluka nsañu yalema yekala muBayiboluku, twatela kwiluka chikupu nsañu yekalamu kulonda tuyilejeña yuma yahosha Bayibolu.—Yish. 2:1-5.