Keñakeñenu Antu Atelela
1. Twamwekeshaña ñahi netu twasakililaña hakukooleka kwakukalakala mumudimu wakushimwina?
1 Hampinji yazatileñayi Yesu mudimu windi wakushimwina wakundejeleña adizoza nansañu yayiwahi. (Isa. 61:1, 2) Hakwikala atuñanda aKristu, anetu nawa tukweti kukooleka kweneni kwakumwimbujola mumudimu wetu wakabulaña kuzeyesha, wakukeñakeña chikupu antu atelela mwiluña detu.—Mat. 10:11; 2 Kor. 5:20.
2. Indi Pawulu wahimpileña ñahi njila yakushimwina, nawa chumanyi chafuminumu?
2 Himpenuña Njila Mwakushimwina: Kapostolu Pawulu wadiña nachaaku chakusambila kushimwina mushikola kudi aYudeya nikudi antu abalumukili kwikala aYudeya. (Yil. 14:1) Hadiñawu muFwilipi, aPawulu naSilasi ayili nakukeñakeña antu kwiluña ‘kwatoñojokeluwu nawu diku kwapompeleleñawu antu nakulomba.’ Ashimwinini izanvu dawambanda, nawa mumbanda wumu hakachi kawu, wejina daLidiya wetejeli nsañu yalala.—Yil. 16:12-15.
3. Kubombela hamudimu wetu wakushimwina kwitala nikwitala, tunateli cheñi kushimwina kumaluñanyi?
3 Hamudimu wenu wumukweti wakushimwina kwitala nikwitala, komana kwila mushimwina cheñi antu hayitesheni, mumaluña akunookela, kunyidimu, munyikwakwa, kumaluña akulanda nakulandulula nihayisankanu yamwiluña denu nehi? Kwikala asoñama nikuhimpa njila jakushimwina mwiluña denu kukuyileñela ‘kusweja kukalakala mumudimu waMwanta.’—1 Kor. 15:58.
4. Tunateli kwiladi neyi chipompelu chetu chikweti iluña danyanya dakushimwina?
4 Akwakushimwina amavulu akalakalahu dehi chikupu mumudimu wakushimwina kuhitila mukuya kuchipompelu chacheñi mwituña dawu hela mwituña dacheñi. Amakwawu anadizi idimi dadiha kulonda ashimwini antu afuma kwituña dacheñi ekala mwiluña dawu.
5. Twatela kumona ñahi mafuku itunakushakamamu, nawa chumanyi chitwatela kufuukulahu kwila?
5 Wejima wetu twatela kwiluka netu “iha diyi mpata yamunu mwishina.” (Mat. 9:37; 13:38) Chineli idi ituña datama didi dehi kwakwihi nakukuma, wejima wetu twatela kushinshika chihandilu chetu, nyidimu yitweluka, niwuswa wutukweti wakukalakala chikupu mumudimu wakushimwina. Yehova watushiika chikupu nindi neyi tutwamijaku Wanta, wakatukiswila hakukalakala chikupu mumudimu wetu wakushimwina.—Mat. 6:33.