Shimwinenuña naKunyakala!
1. Kukonkomwenanyi kwaPawulu kwakeñekaña kushaku kashinshi makonu?
1 ‘Shimunaku mazu nakunyakala.’ (2 Tim. 4:2) Muloñadi kukonkomwena kwaPawulu chikwalemena makonu? Indi awa mazu anateli kutukundama ñahi muwumi wetu niwawantu amakwawu?
2. Muloñadi wutwadikitilaña hakukeñakeña antu achidi kanda atiyi nsañu yayiwahi?
2 Antu Adi Muwubanji: Antu amavulu mukaayi kejima kanda atiyi nsañu yayiwahi yinateli kuyiletela wamwinu. (Rom. 10:13-15; 1 Tim. 4:16) Antu ashinshika amavulu twayiwanaña mumaluña akushimwina mutwazatilaña kakavulu. Neyi tuya nakushimwina hefuku dacheñi hela mpinji yacheñi, tunateli kuwana muntu wacheñi. Neyi tudikita nakukeñakeña antu tukwikala nachinleji chitooka nawa hitukwikala namuloña wamashuku.—Yil. 20:26.
3. Tunateli kuzatisha ñahi mpinji chachiwahi mumudimu wakushimwina?
3 Hela chakwila, akwaKristu amuyaaka nkulakaji yakusambila amweni ikañesha dasweja, ‘awanishili muYerusalema mwejima nantañishilu yawu.’ (Yil. 5:28) Komana twafwilaña ‘kushimwina wunsahu chikupu’? (Yil. 10:42) Komana twazatishaña mpinji chiwahi neyi tudi mumudimu wakushimwina? Neyi tunakwimena akwetu anakufuntila kudi muntu wayikanini, komana twashimwinaña antu anakuhita?
4. Indi kushimwina nakunyakala kwatukwashaña ñahi kwikala atona?
4 Tusweji Kwikala Asoñama: Chineli kukuma kwadinu ituña kudi dehi kwakwihi, twatela kwikala asoñama, nawa atona. (1 Tesa. 5:1-6) Neyi tuhoshaña mpinji yejima hakuchiñeja kwetu kwaWanta, chikutukwasha kubula kwakamena yuma yamakonu. (Luka 21:34-36) Chineli ‘tunakutalila nankashi’ ifuku daYehova twadikitaña hama mumudimu wakushimwina wapulwishaña antu.—2 Pet. 3:11, 12.
5. Indi kulemesha wumi kwatusañumunaña ñahi mumudimu wakushimwina?
5 Neyi tushimwinaña nakunyakala dikwila nawu twalemesha wumi neyi Yehova: ‘Hakeñaña muntu niwumu kunoñaku, wakeñaña antu ejima abalumuki munyichima.’ (2 Pet. 3:9; Ezek. 33:11) Dichi, tufwilenu kushimwina antu amavulu amwiluña detu, kulonda tumuhameki Yehova.—Mas. 109:30.