Chikasha Chalwihu

◼ Komana aYinsahu jaYehova atela kwinka akwawu nsañu yasonekañawu hela mazu akukwata ajimpanji?

Mpanji jaBayibolu jatukoleshaña. (Yil. 15:32) Dichi twatiyaña kuwaha kwinka antu abulili kuya nakupompa iyi nsañu yakukolesha. Chineli kudi yozelu yashiyashana yakukwatilaku mazu, muntu nateli kukwata mazu ampanji nakwinka akwawu chakubula kuumba mpinji. Amakwawu ahemba jimpanji jajivulu jamazu akukwata, kushilahu nijimpanji jahaninuwu dehi yaaka yakunyima, nawa afwilaña kwinkahu akwawu. Amakwawu atuña jiWebu sayiti nakushahu jimpanji kulonda muntu wudi wejima yaloñololi.

Kukala kwosi neyi tukwata mazu ampanji netu tuzatisheña nachikasa chetu. Kubombelahu, aeluda anateli kuloñesha kulonda akwati mazu ajimpanji akwinka antu akata amuchipompelu akañanyaña kuya nakupompa. Hela chochu, kudi yuma yatela kutuleñela kubula kwinka akwetu nsañu yasonekawu hela mazu akukwata ajimpanji.

Hamuloña wakwila jimpanji ajihanaña kwesekeja nakukaankila kwawantu anakutiyilila, tunateli kutiyila yikuma yamumpanji yakwatawu mwaheña muloña hituneluki chuma chaletesheli ahani mpanji munoyu njilaku. Kubombelahu, chikutukalila kwiluka muntu wahanini mpanji nimpinji yahaniniyi, hakwila nawu tukuhweleli chikupu netu nsañu yitunakutiyilila yalala nawa yakatataka. (Luka 1:1-4) Cheñi nawa, nsañu yasonekawu hela mazu akukwata ajimpanji anateli kuleñela antu kulemesha amakwawu hela kutambwila kalemesha kabula kutelela.—1 Kor. 3:5-7.

Nduñu wamaana nikashinshi wazataña nañovu hakuloñesha yakudya yakuspiritu ‘yashikila’ nawa ‘hampinji yatelela.’ (Luka 12:42) Chumichi chabombelamu nimpanji jahanañawu hayipompelu yawaYinsahu jaYehova ninsañu yakukwata yinateli kuloñololawu haWebu sayiti jw.org. Tunateli kukuhwelela netu izaza danduñu wamaana nikashinshi Niizaza dachu Dalombolaña dinateli kutuloñeshela yuma yitwakeñaña hakwila tukoli muchikuhwelelu.—Yil. 16:4, 5.