Chakuzatisha Mazu Akukwata
1. Kubombela hanyikanda, chitwanyi chatukwashaña chitukweti?
1 Amavulu atiyaña kuwaha kutaña mazu achalala amawahi nawa aloña ha jw.org. (Mukwa. 12:10) Indochu enu, mwazatishaña awa mazu akukwata? Chumichi chikuyikwashaña kutiyilila kunsañu jidi hawebu sayiti yetu. Indi mazu akukwata anateli kutukwasha ñahi?
2. Tunateli kuzatisha ñahi mazu akukwata hakudifukula kwahalwetu hela kwachisaka?
2 Hakudifukula Kwahalwetu NikwaChisaka: Kutiyilila kumazu akukwata aBayibolu, magazini hela anyikanda hampinji yitudi halwendu hela yitunakuzata tunyidimu, kukutukwasha kuzatisha chiwahi mpinji yetu. (Efwes. 5:15, 16) Tunateli kwikala nanjila jashiyashana jakuzatisha hakudifukula kwachisaka kuhitila mukutiyilila kumazu akukwata iku tunakulondela munyikanda yetu. Kutiyilila kunsañu yakwatawu hampinji yakudifukula kwahalwetu kukutukwasha nankashi sweje-e neyi tunakukeña kuwahisha ntañilu yetu hela neyi tunakudiza idimi.
3. Antu amuchidinyi ekala mwiluña detu akuhetela mumazu akukwata?
3 Mwiha: Antu ekala mwiluña detu akañanyaña kutaña nyikanda muloña wanyidimu etejaña kutiyilila kumazu akukwata. Hadaha tunateli kuwana antu ahoshaña idimi dacheñi nawa akeñaña kutiya nsañu yaWanta ‘mwidimi dachisemwa’ chawu. (Yil. 2:6-8) Mumaluña amakwawu, kutiyilila hichuma chalema muchisemwa chawu. Chakutalilahu, muchisemwa chawaHmong, antu alejaña anyana chahandileñawu kunyima nawa anyana ahembaña chiwahi nsañu yayilejañawu. Antu amavulu muAfrica atiyaña kuwaha kutiya nsañu yamwekeni.
4. Malwihwinyi itwatela kudihula kutalisha hakukwasha antu amwiluña detu?
4 Komana antu amwiluña denu anateli kuhetelamu neyi muyivumishila mazu akwatawu adi mwidimi dawu? Muntu nateli kuhetela mumazu akukwata itwatemeshaña haemelu? Tunateli kuloñolola mazu amukanda akukwata nakuyisha ha CD kulonda tumwinki mwiniitala wudi nampwila, hadaha kumwinkela hamu namukanda? Mukanda, buloshuwa, magazini hela tilakiti yamazu akukwata imunahani mwiha mwatela kuyisoneka. Mazu akukwata ayikwata kulonda tuyizatisheña hakudifukula kwahalwetu nikutumba nachu mbutu yaWanta yachalala.—1 Kor. 3:6.