Kakelenu kuNdandanda Yenu yaKutaña Bayibolu Hefuku-Hefuku

Muloña wakwikala nayuma yayivulu yakwila muchihandilu, komana chayikalilaña kulondela ndandanda yenu yakutaña Izu daNzambi hefuku-hefuku? (Yosh. 1:8) Neyi dichichidi, esekenu kuzatisha njila yimu haniji njila jinalondelihu:

• Ikalenu nayuma yakuyanukishaku hefuku-hefuku. Shenu alamu hachozelu chenu kulonda yiyanukisheña mpinji yakutañilahu Bayibolu.

• Shenu Bayibolu hakuyipelelaña kuyimona swayi. Neyi mwazatishaña Bayibolu yakupulinta hakutaña, yishenu hakuyipelelaña kuyimona swayi mafuku ejima.—Kuhit. 11:18.

• Tiyililenuña kumazu akukwata dehi. Tiyililenu kumazu akukwata dehi hampinji yimunakuzata nyidimu yenu yahefuku-hefuku. Tara, payiniya nawa mama yawantu wazataña nawufuku, wahosheli nindi, “Kutiyilila kumazu amuBayibolu akukwata dehi hampinji yinnakuzata nyidimu yahetala, kwankwashaña kukakela kundandanda yami yakutaña Bayibolu hefuku-hefuku.”

• Bayi muzeyaku. Neyi kudi chuma chinamwekani chimwabula kukuhwelela nawa munakutiya neyi mukutwesha wanyi kutaña Bayibolu kwesekeja nachimwafuukula, tañenuku hela mavasi antesha amuBayibolu henohu kanda muyi nakukaama. Hela chakwila mutañaña hohu mavasi antesha hefuku-hefuku, chumichi chinateli kuyikwasha hama.—1 Pet. 2:2.