Mudimu Wutwasweja Kulemesha
1. Indi Yesu wamwekesheli ñahi nawu walemesheli mudimu wakushimwina?
1 Yesu waswejeli kulemesha mudimu wakushimwina. Wazatili nañovu, nakwenda yintampu yayilehi muPalestine mwejima kulonda kushimwina antu amavulu. Wapelesheli chihandilu chindi kulonda yazateña mpinji yeneni mumudimu wakushimwina. (Mat. 8:20) Chelili mazaza awantu amwimiki kulonda yoki antu jawu akata, wahosheli nindi: “Chiña nishimwina nsañu yawanta waNzambi yayiwahi nikunyikala yikwawu yinashali nawa, muloña dichi chantemesheleluwu.”—Luka 4:43.
2. Muloñadi Yesu chalemesheleliyi mudimu wakushimwina?
2 Muloñadi Yesu chaswejeliyi kulemesha mudimu wakushimwina? Wafwilileña chikupu kujilika ijina daYehova. (Mat. 6:9) Wamukeñeli Tata yindi wamwiwulu nawa wafwilileña kuzata mwaya muchima Windi nikwovwahila nshimbi Jindi. (Yow. 14:31) Kubombelahu, wayakameneneña antu chikupu nawa wakeñeleña kuyikwasha.—Mat. 9:36, 37.
3. Tunateli kumwekesha ñahi netu twalemesha mudimu wakushimwina?
3 Mwimbujolenuña Yesu: Kulemesha mudimu wakushimwina neyi chawulemesheliyi Yesu hichuma chakala muloña yuma yamukaayi yatumanishilaña mpinji nawa yatuluwañeshaña hama. (Mat. 24:37-39; Luka 21:34) Dichi twatela kushinshika yuma yabadika kulema, nikwikala nampinji yakuloñesha nikuya nakushimwina mpinji yejima. (Fwi. 1:10) Twafwilaña kupelesha chihandilu chetu nikuleka kukwata chikupu kuyuma yampata yamunu mwishina.—1 Kor. 7:31.
4. Muloñadi chichalemena kuzata mudimu wasweja kulema makonu?
4 Neyi mpinji yinakehi, muntu wamaana wasambilaña kuzata mudimu wasweja kulema. Chakutalilahu, neyi yeluka nindi kunakwinza nvula yeneni yampepela yikuleta wubanji, wukuzatisha mpinji yindi niñovu hakudiloñesha kulonda yapulwishi chisaka chindi nikubabesha antuñi nindi. Wukuleka kuzata yuma yabula kulema. Mpinji yinashaluku hakwila Amagedoni yinzi yinakehi dehi. (Zef. 1:14-16; 1 Kor. 7:29) Hakwila nawu tudamwini etu aweni niantu atutiyililaña, twatela kudihemba etu aweni nintañishilu yetu, chili muchipompelu hela kwacheñi. (1 Tim. 4:16) Chalala, hakwila nawu tukapuluki twatela kusweja kulemesha mudimu wakushimwina!