Komana Anyanenu Anadiloñeshi?
1. Muloñadi anyana ashikola chatelelawu kudiloñesha?
1 A Yinsahu jaYehova achidi atwansi amonaña kukala kwakuvulu hashikola. Mpinji yejima chashinkulawu shikola amonaña kukala kwashiyashana niikañesha. Hela chochu, kukala kweniku kwayinkaña kukooleka ‘kwakushimuna wunsahu wansañu yalala.’ (Yow. 18:37) Komana akekala adiloñesha mpinji yonsu?
2. Chumanyi chatela kwilukawu anyanenu hakwila nawu adiloñeshi?
2 Komana anyanenu eluka chikupu yidika yejima yakwituña nimafuku akunooka awusenji nikudiñija muniyi yidika chikwatamina? Komana anadiloñeshi kudikaña nekakeja dakufwila kutaña shikola yahewulu, kudiluka nawambanda hela amayala, nikunwa walwa hela yitumbu yashetana? Komana atela kuhosha hohu nawu yuma yatama ayikaanisha muchipompelu chawu tahindi eluka chakulumbulula yuma yakuhwelelawu?—1 Pet. 3:15.
3. Indi anvwali atela kuzatishaña ñahi mpinji yaKudifukula kwaChisaka kwamelela kulonda akwashi anyanawu?
3 Zatishenu Mpinji yaKudifukula kwaChisaka kwaMelela: Kafwampi, mukuhanjekaña hakukala kukumonañawu anyanenu yaaka yejima yachiduwu hashikola. Neyi muzata nañovu kulonda muhanjeki hakukala kunateli kumonawu henohu kanda ashinkuli shikola kukuleñela anyanenu kwikala akola. Kwila muzatishaña mpinji yaKudifukula kwaChisaka kwamelela kulonda muhanjeki haniyi nsañu nehi? Munateli kuyihula anyanenu yuma yayakameshaña nankashi hampinji yinakutoñojokawu kushinkula shikola. Munateli kuhituluka cheñi munsañu yimwahanjekeluhu yaaka yinahituhu chineli anyanenu anakuli dehi nawa aneluki yuma yayivulu. (Mas. 119:95) Munateli cheñi kuhituluka muyuma yimunadizi nawanyanenu enu mwikala neyi ntañishi, ntañishi wafumbaña akashikola chakukeña mudimu, hela mukwawu mukwashikola. Yitañishenu anyanenu chakwakula kuzatisha Bayibolu nichakuzatisha yozelu yidi neyi Ukupelulula niIfipusho Abacaice Bepusha. Nvwali wumu wahitulukileñamu nawanyanindi kulonda yayikwashi kuhanjeka nawantañishi jawu amaha neyi hiyakushinkula shikola kala mpinji nikuyileja nawu hiyaYinsahu jaYehova.—Talenu Kaposhi Kakutalila, December 15, 2010, mafu 3-5.
4. Indi anvwali amaana anateli kwiladi?
4 Kukala kunakumonawu atwansi akwaKristu munanu mafuku akukuminina kunakuswejelaku ‘kukala.’ (2 Tim. 3:1) Anvwali akweti maana esekaña kutoñojokela chadimu kukala kunateli kumonawu anyanawu nikuyikwasha chakumanisha kukala kweniku. (Yish. 22:3) Henohu kanda ashinkuli shikola, zatenu nañovu hakwila nawu mukwashi anyanenu kulonda adiloñeshi.