Diloñeshenu Chikupu Kulonda Mushimwini haShikola
1. Kukoolekanyi kumukweti hashikola?
1 Neyi dichaaka chatachi hela chamuchiyedi chimunashakami hashikola, enu atwansi akwaKristu mwamonaña kañalaña. Nawa cheñi mudi nakukooleka ‘kwakushimwina nsañu yalala.’ (Yow. 18:37) Komana munadiloñeshi kulonda mushimwini?
2. Chumanyi chikuyikwashaku kushimwina hashikola?
2 Hakwila nawu mutweshi muyuma yejima muchihandilu chenu, anayifumbi kudi Yehova, kudi anvwali jenu, nikudi nduñu wamaana nikashinshi. (Yish. 1:8; 6:20; 23:23-25; Efwes. 6:1-4; 2 Tim. 3:16, 17) Ichi muneluki dehi kukala kumwatela kumona hashikola. Muloña wakuyifumba kudi Nzambi nikwiluka kukala kumwamonaña, diloñeshenu kulonda mushimwini. (Yish. 22:3) Toñojokenuña chikupu hanshimbi nihawukwashu wawuwahi wamuNsona wudi munyikanda yiyedi ya “Young People Ask” nimuyibaba yadifwanaku yasonekañawu mpinji yejima yaAwake!
3. Munateli kushimwina munjilanyi?
3 Chineli mudi heluña dambukaku, munateli kushimwina munjila jajivulu. Neyi akwenu akumona nvwalilu yenu yayiwahi nimmwekenu, yililu ninhoshelu, nichimwalemeshaña akwenu niantañishi nichimwazataña chiwahi mushikola nikwiluka nawu mukweti chikuku chakola, amakwawu akuyihula nawu, “Muloñadi chiwambukilaku?” (Mal. 3:18; Yow. 15:19) Munateli kwikala nakukooleka kwakushimwina nikulumbulula yuma yimwakuhwelela. (1 Tim. 2:9, 10) Mpinji yejima, hadaha mukumonaña kukala kudi neyi yidika yetuña nimafuku akunooka. Neyi akuyihula chimwambulilaña kwila yumiyi, komana mukukumina dakuhosha nenu, ‘Nsakililu yami yakaanisha; Nidi Chinsahu chaYehova,” tahindi wukwikala himukandaminu wakushimwina hadi Tata yenu wukweti kukeña, Yehova? Neyi mudiloñesha neyi chakeñañayi Yehova kukuyileñela mwikali adiloñesha kushimwina kudi akwenu akashikola, antañishi hela antu amakwawu.—1 Pet. 3:15.
4. Muloñadi chimunakuhweleli nenu munateli kushimwina hashikola?
4 Hela chakwila mudi nawoma muloña mudi hashikola, ilukenu nenu kudi antu amavulu anakukeña nawu mutwaleki nashikola yenu. Cheñi nawa, twatiyaña kuwaha nampwila yimukweti yakukeña kushimwina antu heluña dambukaku. Dichi, umikenu nawa diloñeshenu kulonda mushimwini hashikola!