Bayi Mushintajalaku

1. Kuhamuka kunateli kuyikwasha ñahi, nawa muloñadi?

¹ Mwashintajalahu dehi kushimwina hashikola hamuloña wakuchina nenu akuyiseha? Mwatela kwikala ahamuka hakwila nawu mushimwini, sweje-e neyi mwatiyaña nsonyi. Chumanyi chikuyikwasha?

2. Neyi himukushimwina hashikola, muloñadi chimwatela kuzatishila kashinshi?

² Zatishenu Kashinshi: Hela chakwila iluña dahashikola didatela kwikala iluña denu dakushimwina, mwatela kwanuka nenu kutachika kuhanjeka namuntu wudi wejima nsañu yakuspiritu neyi chimwelaña hakushimwina kwitala nikwitala hichuma chaswayuku. Zatishenu kashinshi kulonda mwiluki mpinji yimwatela kuhosha. (Mukwa. 3:1, 7) Munateli kukoolekela mpinji yakuhanjeka mushikola hela yakuzata mudimu wahashikola kulonda mushimuni yuma yimwakuhwelela. Hadaha mukwenu kadizi wukuyihula nindi mushimuni chimwabulilaña kwila yuma yikwawu. AkwaKristu amakwawu alejaña antañishi yawu hakutachika shikola nawu hiyaYinsahu jaYehova nawa enkaña antañishi nyikanda yalumbululaña yuma yitwakuhwelelamu. Amakwawu ashiyaña nyikanda hadesiki kulonda akwawu atachiki kwihula malwihu.

3. Munateli kudiloñesha ñahi kulonda mushimwini hashikola?

³ Diloñeshenu: Neyi muloñesha, himukutiya nawomaku. (1 Pet. 3:15) Dichi toñojokenu hamalwihu atela kwihulawu, nawa toñojokenu chimwatela kwakula. (Yish. 15:28) Neyi chinatwesheki, hakuya kushikola, sendenu Bayibolu yenu ninyikanda yantesha mwipakumuna mumwasendelaña nyikanda kushikola, yidi neyi mukanda waUkupelulula, Young People Ask, ninyikanda yahoshaña hayileñaleña, kulonda muyizatisheña. Lejenu anvwali jenu kulonda hakudifukula kwachisaka mudizeña chakwakula malwihu.

4. Muloñadi chimwatela kutwalekahu nakushimwina hashikola?

⁴ Bayi Mutiya Womaku: Bayi mutoñojoka nenu mpinji yejima akwenu akashikola akuyisekesha neyi muhosha hansañu yalalaku. Amakwawu anateli kuyihameka hamuloña wakuhamuka nawa anateli kutiyilila. Ilaña neyi akaana bayi muneñaku. Yehova wukutiya kuwaha muloña muneseki. (Heb. 13:15, 16) Mulombenu kulonda yayikwashiku ‘mutwalekuhu kushimuna chakadi woma.’ (Yil. 4:29; 2 Tim. 1:7, 8) Mukutiya kuwaha chikupu neyi muntu yatiya nsañu yimunakumuleja. Muntu yeniwu nateli nikwikala kambuña aYehova!