Chakwila

Hakutachika Kudizisha Antu Bayibolu Mposu Yatachi muAugust

“Komana mwadihulahu dehi muloña wetejelayi Nzambi kutama nimakabi? [Mulekenu yaakuli.] Inakukeña kuyileja yuma yayiwahi yinakuhosha haniyi nsañu.” Tañilenu hamu nsañu yidi heshina dakamutu kanyanya kadi hefu 16 muKaposhi Kakutalila kaJuly-September ninsona yinatenuwu. Mwinkenu magazini nawa loñeshenu kulonda mwakafuntiluku nakwakula lwihu lunalondeluhu.

Kaposhi Kakutalila July–September

Tañenu Masamu 37:10, 11. Kuhiñahu hoshenu nanenu: “Komana munakutoñojoka nenu ichi chikaninu keña chishikijewi? [Mulekenu yaakuli.] Iyi magazini yinakuhosha hawuprofwetu wamuBayibolu wutanu nawumu wambokamboka wunakushikijewa makonu, wuprofwetu wunakumwekesha nawu ichi chikaninu keña chishikijewi.”

Awake! August

“Inakukeña kwiluka chimwatoñojokaña haniyi vasi. [Tañenu 1 Samweli 16:23.] Iyi vasi yinakumwekesha nawu tumina tukweti ñovu. Komana munatoñojoki nenu tumina tukwawu tunateli kuluwañesha antu? [Mulekenu yaakuli.] Iyi magazini yinakuhosha chitwatela kutonda tumina twatuwahi nichitwatela kukwasha anyanetu kwila mwenimu.”