Nyiloña Ikumi naYiyedi Yatuleñelaña Kushimwina

Muloñadi wutwatañishilaña nikushimwina nsañu yayiwahi? Komana muloña waweni wekala wakukwasha antu ashinshika kwiluka njila yaya kuwumi tahindi? (Mat. 7:14) Iwu diwu muloña watachi wunashimunuwu heshina, ilaña hidiwu muloña waweni watuleñelaña kushimwinaku. Munakutoñojoka nenu muloña wumu wudihi wasweja kulema hakachi kanyiloña ikumi nayiyedi yidi heshina yatuleñelaña kushimwina?

1. Mudimu wakushimwina wapulwishaña mawumi awantu.—Yow. 17:3.

2. Wasoñamishaña antu atama.—Ezek. 3:18, 19.

3. Waleñelaña kushikija wuprofwetu wamuBayibolu.—Mat. 24:14.

4. Wamwekeshaña kuloña kwaNzambi. Kwosi muntu wukuhosha nindi Yehova hanayinki antu atama mpinji yakubalumuka mumuchima henohu kanda yayijilumunuku.—Yil. 17:30, 31; 1 Tim. 2:3, 4.

5. Mudimu wakushimwina watukwashaña kukalakala mudimu wetu wakukwasha antu kuspiritu alandiluwu namashi aYesu.—Rom. 1:14, 15.

6. Watukwashaña kubula kwikala namuloña wamashi.—Yil. 20:26, 27.

7. Twatela kuzata iwu mudimu kulonda twakahandi.—Ezek. 3:19; Rom. 10:9, 10.

8. Wamwekeshaña nawu twakeña antuñi netu.—Mat. 22:39.

9. Wamwekeshaña nawu twamwovwahila Yehova niMwanindi.—Mat. 28:19, 20.

10. Kushimwina hikudifukula.—Heb. 13:15.

11. Mudimu wakushimwina wamwekeshaña nawu twamukeña Nzambi.—1 Yow. 5:3.

12. Waleñelaña kujilika ijina daYehova.—Isa. 43:10-12; Mat. 6:9.

Kafwampi, iyi hidiyi nyiloña yatuleñelaña kushimwina hohuku. Chakutalilahu, mudimu wakushimwina wakoleshaña chikuhwelelu chetu nawa watwinkaña kukooleka kwakwikala akwakukalakala hamu naNzambi. (1 Kor. 3:9) Hela chochu, muloña wamunaambala 12 dimuloña wasweja kulema watuleñelaña kushimwina. Chili antu akutiyilila hela nehi, mudimu wakushimwina wajilikaña ijina daNzambi nawa wamukwashaña Yehova kwakula muntu wamusawulaña. (Yish. 27:11) Eñañi tukweti nyiloña yayiwahi yatela kutuleñela ‘kutwalekahu kutañisha nikushimwina nsañu yayiwahi chakubula kuleka.’—Yil. 5:42.