Anyi Akukeña Kutaña Ichi Chibaaba?
1. Neyi tunakutaña magazini etu aKaposhi Kakutalila chili Awake!, chumanyi chitwatela kutoñojokahu nawa muloñadi?
1 Hakusoneka Kaposhi Kakutalila niAwake! atoñojokaña hadi antu amukaayi kejima. Dichi mumagazini mwekalaña yibaaba yahoshaña hansañu yashiyashana. Neyi tunakutaña chibaaba nichibaaba mumagazini etu, twatela kutoñojoka hadi antu akukeña kutaña chibaaba chenochu nawa twatela kushaku muchima kulonda tuyinki antu wenowu.
2. Nsañwinyi yasonekañawu mumagazini etu yinateli kukeñawu antu?
2 Komana Kaposhi Kakutalila kakatataka kanakuhosha hansañu yamuBayibolu yimwahanjekeli namukwenu imwazataña nindi? Komana mudi chibaaba chinakuhosha hansañu yachisaka yinateli kukwasha ntaña yenu? Mukweti mukwenu wunakufwila kuya kwituña dinashimunuwu muAwake!? Komana kuduhu magazini yikuleta ikoku kudi akwanyidimu amakwawu hela nyitayi yanfulumendi yamwiluña denu? Chakutalilahu, magazini yinakuhosha hakukala kwamonañawu atushinakaji anateli kuyikeña kudi antu azatilaña mumatala mwahembelañawu atushinakaji. Nyitayi yatalaña hakuhemba nshimbi yinateli kukeña kutaña magazini yinakuhosha hansañu yawubanji.
3. Shimunenu yuma yamwekeni yamwekeshaña kulema kwakuhana magazini mudi nsañu yituneluki netu anateli kuyikeña kudi antu amakwawu.
3 Yuma Yafumañamu: Hanyima yakutambula Awake! yaOctober 2011 yahosheleña nawu “How to Raise Responsible Children,” antu adisumbula akuSouth Africa atemesheli nshiña kumashikola 25 amwiluña dachipompelu chawu. Antu akushika ku 22 atambwili magazini nawa ayihanini kudi anyana ashikola. Antu amakwawu adisumbula munidi ituña azatishili njila yoyimu nawa ahanini magazini amavulu hamashikola mwiluña dawu. Antañishi ahashikola yimu afuukwiluhu kuzatisha magazini mulungu nimulungu hakudiza nikuyitañaña hampinji yakudiza hashikola. Awa antu adisumbula amulejeli nkoñi wañinza yuma yamwekeni. Nkoñi wañinza wakolesheli yipompelu yamuñinza yindi kushimwinaña hamashikola mwiluña dawu. Antu alombeli magazini amavulu chikupu kukasanji kamutayi chakwila awa magazini ayipulintili cheñi.
4. Muloñadi chitunakukeñela kuhana magazini kudi antu amavulu chikupu?
4 Magazini etu ashimunaña mwatalisha yuma yinakumwekana makonu nawa atulejaña hansañu yamuBayibolu niyaWanta waNzambi. Diwu magazini hohu hanu heseki ‘ashimunaña nsañu yawamwinu.’ (Isa. 52:7) Dichi tunakukeña kuyihana kudi antu amavulu chikupu. Njila yayiwahi yitwatela kuyihaninamu hikudihula netu, ‘Anyi akukeña kutaña ichi chibaaba?’