Chikasha Chalwihu
◼ Mukwakushimwina wabula kupapatishewa hakwila amwiteji yapapatishewi, watela kupompaña kupompa kwachipompelu nikushimwina kushika hachipimwinyi?
Kufuukulahu kupapatishewa hichuma chalema nankashi chatela kwilayi muntu. Dichi, henohu muntu kanda amwiteja kupapatishewa, watela kwiluka chachiwahi yuma yakeñañayi Nzambi kudi yena. Kubombelahu, watela kutachika kumwekesha muchima wakufwila kulondela nshimbi jaNzambi.
AkwaKristu ayikoleshaña kutwalekahu kupompa hamu, dichi mukwakushimwina wabula kupapatishewa watela kutachikañahu dehi kumwekesha iyena dakuwanikaña kukupompa kwachipompelu. (Heb. 10:24, 25) Watela cheñi kwakulañahu hakupompa. Hadaha, watela nikusonekesha muShikola yaMudimu waTeokalatiki, hela chakwila ilu hilushimbuku.
Kubombelahu, chineli akwaKristu ayinka mudimu wakushimwina nsañu yayiwahi nikwilisha atumbanji, mukwakushimwina wabula kupapatishewa watela kushimwinaña mpinji yejima henohu kanda yapapatishewi. (Mat. 24:14; 28:19, 20) Watela kushimwina hadi tukweji tuñahi henohu kanda yapapatishewi? Mwatela kumwinka mpinji yashikila kulonda yamwekeshi nawu nafuukuluhu kutwalekahu nakudikita mpinji yejima mumudimu wakushimwina kakweji nikakweji. (Mas. 78:37) Hela chochu, hatela kuhita mpinji yeneni wanyi kufuma hatachikiliyi kushimwina nakushika hakupapatishewa, hadaha hakuhita hohu tukweji twantesha. Watela kuzataña maora añahi hakakweji nikakweji mumudimu wakushimwina? Hikwekala nshimbi yayeni yatuñawuku. Aeluda atela kwiluka chidi nshakaminu yamukwakushimwina wudi wejima nawa atela kumwekesha yililu yayiwahi.—Luka 21:1-4.
Aeluda (hela akoñi akwakuzatila ekala muyipompelu mwekala aeluda antesha) anakumuhitulwishamu kadizi wunakukeña kupapatishewa atela kwanuka nawu antu ashiyashana, nawa atela kwikala nakashinshi hakwila eluki nawu kadizi nashikuhu kupapatishewa. Anateli kukuhwelela nawu wudi nampwila yayeni yakukeña kwikala Chinsahu chaYehova nawa watela kumwekesha kusakilila hakukooleka kwindi kwakwikala mukuloñesha kwaYehova nikushimwina. Aeluda eluka nawu kanda yapami kuspiritu hela kukuluka yitembi neyi chaduwu akwakushimwina apapatishewa. Neyi aeluda amona nawu kadizi hanashikuhu kupapatishewaku, atela kumuleja munjila yayiwahi yuma yamuNsona yinaleñeli afuukuluhu nawu yabuli kupapatishewa nikumukwasha kuspiritu.