Kwashenu Atudizi aBayibolu Kwikala Akwakushimwina Nsañu Yayiwahi yaWanta
1 Mudimu wayinkeli Yesu atumbanji twindi washimunawu haMatewu 28:19, 20 wadiña weneni chikupu. Atumbanji twaKristu ayilejeli kwilisha atumbanji amavulu, adi katwalekahu namudimu wakwilisha atumbanji kumpinji yakumbidi. Atuñili chikuku chamudimu wakukumishaku wakushimwina nsañu yayiwahi yaWanta waNzambi mukaayi kejima hampinji yalema yakukumishaku, muyinu mpinji yitunakushakama.—Mat. 24:14.
2 Atudizi etu aBayibolu anateli kwikala anyanetu hela antu amakwawu akeñaña kudiza Bayibolu nanetu. Tunakukeña kukwasha chikupu antu amuchidiwu kulonda eluki nikukalakala mudimu wakukwasha amakwawu kwikala atumbanji aYesu Kristu.—Luka 6:40.
3 Dizishenu Atudizi aBayibolu Chakushimwina: Koleshenu antu yimwadizaña nawu kulejaku amakwawu yuma yinakudizawu. Yilejenu yakuhumañana yayiwahi yamumudimu wamwiha. Dizishenu anyanenu hampinji yachiduwu atwansi kukalakala mumudimu wakushimwina chikupu kwesekeja nahanakumini ñovu jawu. (Mas. 148:12, 13) Yidizishenu kuhitila muyuma yimwahoshaña niyuma yimwelaña nenu mwalemesha chikupu mudimu wakushimwina muchihandilu chenu.—1 Tim. 1:12.
4 Yehova wazatishaña hohu antu etejaña nikwovwahila nshimbi jindi jaloña. Hela chochu, akwakushimwina amaha hiyeluka yuma yayivulu neyi chelukawu akwakushimwina aWanta adihana nawa apapatishewaku, ilaña amaha atela kukuhwelela nikutwesha kulumbulula nsañu yalema yamuBayibolu. (Talenu Abaiteyanya, mafu 79-82.) Chiyafumawu chikupu ‘muBabiloni Muneni’ nawa neyi analeki kudiñija munsañu jamatuña nachiyulu, atela kuwanikaña kukupompa kwachipompelu mpinji yejima.—Chim. 18:2, 4; Yow. 17:16; Heb. 10:24, 25.
5 Neyi mwiluka nenu kadizi wenu wumu waBayibolu nashikuhu kwikala mukwakushimwina wabula kupapatishewa, mwatela kumuleja nkoñi wakutwaminina. Nkoñi wakutwaminina wukuloñesha aeluda ayedi kulonda muhumañani nawu hamu nakadizi wenu waBayibolu kulonda amoni neyi nashikuhu kwikala mukwakushimwina wansañu yaWanta wabula kupapatishewa hamu nachipompelu. Mukwikala cheñi nakukooleka kweneni kwakutwalekahu kumudizisha kadizi wenu waBayibolu hampinji yimunakuzata nindi mumudimu wamwiha.