Zatishenu Chiwahi Mpinji Yenu muMudimu waKushimwina
1 Tukweti mudimu weneni chikupu wakuzata mumudimu wetu wakushimwina, nawa mpinji yinashaluku yantesha. (Yow. 4:35; 1 Kor. 7:29) Kuhitila mukudiloñesha chachiwahi nikufuukulahu chadimu, tunateli kuzatisha chiwahi mpinji yitunafuukuli kuzatisha mumudimu wakushimwina.
2 Diloñeshenu: Henohu kanda muyi nakuhumañana kulonda muyi mumudimu wamwiha, mwatela kusenda nyikanda yimunakukeña kuzatisha nawa loñeshenu chiwahi mwakuhanina nyikanda yeniyi. Neyi munamanishi dehi kuhumañana nawa neyi analombi dehi, yenu mumudimu wamwiha. Ichi chikuyikwashaku enu ninowu yimukuzata nawu kuzata chikupu mpinji yimunakukalakala mumudimu wamwiha.
3 Neyi chakwila anayinki kulombola kuhumañana kulonda kuya mumudimu wamwiha, mwatela kutachika mukunyakashana. Lombolenu mukwihihisha nawa bayi mubadikisha hajiminiti 10 hela 15. Henohu kanda muleji izanvu kuya, mwatela kwiluka nenu muntu wudi wejima neluki muntu wukuzatayi nindi niiluña dakuzatila.
4 Hampinji Yimunakushimwina: Neyi munamanishi dehi kuhumañana kulonda muyi mumudimu wamwiha, bayi mulabajalaku, yenu kwiluña denu dakushimwina. Kakavulu chekala chachiwahi akwakushimwina ayedi kuzatila hamu. Kwatwinkaña mpinji yakudikolesha nikudidizisha wumu namukwawu. Ilaña mumaluña amavulu akushimwinamu, anateli kukalakelamu chikupu neyi muntu yazata nkawindi henohu amakwawu anakushimwina mukamwihi. Kuzata nkaweyi mumudimu wamwiha neyi chinatwesheki, kwaleñelaña kushimwina antu amavulu, nawa tunateli kudiza chakushimwina nkawetu kumbidi neyi atwilekesha kushimwina hatooka chakubula kukuhwelela. (Talenu Watchtower yaNovember 15, 1985, ifu 13, parakalafu 11.) Kufuukulahu chiwahi nikwikala nampwila yakukeña kukalakala chikupu, kunateli kukwasha ntajikilu yetu.—km-CW 5/99 ifu 7—Chikasha Chamalwihu.
5 Hampinji yimunakufuntilaku, mwatela kutondolwela kwenda chamukunkulwayi kuhitila mukutemeshela nshiña antu munakukeña kuhempula munodu iluña henohu kanda muyi kukwawu. Chachiwahi kutemeshela nshiña antu munakutoñojoka kuya nakuhempula kulonda mwiluki neyi adi hetala. (Yish. 21:5) Neyi munakuhweleli nenu mukushimbulaku chikupu, mwatela kuloñesha kulonda amakwawu adi mwizanvu denu ashimwini mukamwihi hela kuya nakufuntila kudi antu amakwawu.
6 Tunakushakama mumpinji yakumuna chikupu lwakuspiritu. (Mat. 9:37, 38) Iwu mudimu keña wumani katataka. Dichi nkeñelu yetu yatela kwikala yakuzatisha chiwahi mpinji yetu hampinji yitudi mumudimu wakushimwina.